رپورټونه وايي، د طالبانو مشر مولوي هبت الله اخوندزاده په کندهار کې د ولایتي ادارې له چارواکو سره کتلي دي.
باختر دولتي اژانس د ډېسېمبر پر ۱۴مه په خبر کې ویلي چې اخوندزاده د سې شنبې پر سهار د کندهار ادارې له مسوولینو سره وکتل او هغوی ته یې ځینې سپارښتنې وکړې.
اژانس وايي، د طالبانو د حکومت د حج او اوقافو وزیر هم په ملاقاتونو کې حاضر وو.
د طالبانو مشر د اګست په نیمايي کې د هغې ډلې له واکمنېدو راهیسې عام محضر ته نه دی څرګند شوی.
د هبت الله اخوندزاده د تازه لیدنو هېڅ عکس یا ویډیو هم نه ده خپره شوې او تر اوسه کومې خپلواکۍ رسنۍ یې هم څرګندېدل نه دي تایید کړي.
