يو شمېر اروپایي هېوادونو د کوورنا وايرس اومېکرون بڼې د خپرېدو مخنيوي لپاره د محدوديتونو بيا عملي کول پيل کړي دي.
په هالينډ کې د ډېسېمبر له ۱۹مې په ټول هېواد کې سخت ټولبند عملي شوی دی.
د هالينډ وزيراعظم مارک روت وويل چې په هېواد کې یې د اومېکرون بڼې مخنيوي لپاره د ټولبند لګول ډېر اړین وو.
بلخوا په لندن کې د کورونا وايرس اومېکرون بڼې کيسونه پر زياتيدو دي او ښاروال په روغتونونو کې د مرستو لپاره بيړني حالت اعلان کړی دی.
په بريتانيا کې د ډېسېمبر پر ۱۷مه د کورونا وايرس اومېکرون بڼې ۲۵۰۰۰ کيسونه مخې ته راغلي دي.
جرمني د کورونا وايرس لوړ خطر لرونکو هېوادونو په نوملړ کې بريتانیا هم شامله کړې ده.
د دې معنا دا ده چې د ډېسېمبر له ۲۰مې کوم خلک له بريتانيا جرمني ته ورځي نو هغوی به پر دې سربېره دوه اوونۍ قرنطين تېروي چې واکسین شوي وي.
په پاريس کې هم د نوي کال لپاره اورلوبې ځنډول شوي او ايرلينډ په بارونو کې د شپې تر اتو بجو وروسته پر ناستې بندیز لګولی دی.
