په فېلېپین کې د سخت توپان له امله د مړو شمېر تر ۲۰۰ تنو واوښت.
چارواکو د ډېسېمبر پر ۲۰مه وویل چې تر اوسه ۵۲ کسان ورک دي او له یوشمېر صوبو او ښارګوټو سره اړیکې پرې شوې دي.
د فېلېپین د پولیسو په وینا لږ تر لږه ۲۰۸ کسان وژل شوي او ۲۳۹ نور ټپیان دي.
خو چارواکو ويلي چې ليري پرتو سیمو ته د بیړنیو خدمتونو د ادارې کارکوونکي رسیدلي او ښايي د وژل شوو کسانو شمېر تر دې لوړ شي.
دغه توپان د ډېسېمبر پر ۱۷مه په فېلېپین کې پيل شو.
ډيری کسان د ونو د راغورځیدو، د دیوالونو د نړیدو، په سیلابونو کې د ډوبیدو او د ځمکې ښویدنې له امله مړه شوي دي.
