پاکستان ويلي چې د هغه هېواد د ملي امنیت سلاکار د افغانستان سفر د سوداګریزو سهولتونو او د ولسي څانګې د ملاتړ په برخه کې "اساسي لاسته راوړنې" لرلې دي.
معيد يوسف له يو پلاوي سره د جنورۍ پر ۲۹مه نېټه په دوه ورځني سفر کابل ته تللی وو او هلته يې د طالبانو د حکومت د ريیس الوزرا له مرستيال عبدالسلام حنفي او د طالبانو د بهرنيو چارو له سرپرست وزير امير خان متقي په ګډون له نوروطالب وزيرانو سره ولیدل.
د پاکستان د اطلاعاتو او خپرونو چارو وزارت د جنورۍ پر ۳۰ مه پر خپله ووبپاڼه د دې سفر په اړه رسمي اعلاميه خپره کړې ده.
په اعلاميه کې ويل شوي چې دواړو غاړو پر پوله د سوداګرۍ د زیاتوالي لپاره د "ملي کچې د همکارۍ" د يو مېکانېزم پر جوړولو سلا شوي دي.
بيان زياتوي چې دواړو لوريو "د مال په بدل کې د مال" پر راکړه ورکړه هم هوکړه کړې ده چې په دې اړه کړنلاره به وروسته ټاکل کېږي.
دوی دا موافقه په داسې حال کې کړې چې د ۲۰۲۱ز کال د اګست په نیمايي کې پر افغانستان د طالبانو له واکمنېدو راهیسې د هغه هېواد بانکي نظام خورا اغېزمن شوی دی او په غرب کې د افغانستان د شتمنیو د کنګلېدو له وجې هلته د نغدو پیسو زښت کمښت دی.
ټاکل شوې وه چې معید یوسف دا سفر د ۲۰۲۲ز کال د جنورۍ پر ۱۸مه او ۱۹مه کړی وای خو د اسلام اباد په وینا، هغه وخت د خراب موسم له کبله ځنډول شوی وو. البته پر هم هغه ورځ ځينو فعالانو په کابل کې د پاکستان پرضد مظاهره هم کړې وه.
