د ملګرو ملتونو د بشري حقونو د شورا مشرې ويلي چې د ۲۰۲۱ز کال د اګست په نیمايي کې د طالبانو واک ته تر رسېدو را وروسته په افغانستان کې نېږدې ۴۰۰ ولسي وګړي وژل شوي دي.
ميشل باچېلې پرون (مارچ اوومه) په جېنېوا کې د ملګرو د بشري حقونو د شورا په ځانګړې غونډه کې وویل چې په دغو کسانو کې زياتره د اسلامي دولت یا داعش وسله والې ډلې په بریدونو کې وژل شوي دي.
مېرمن باچېلې غونډې ته وويل چې د داعش په غړیتوب ۵۰ تنه تورن کسان هم وژل شوي چې د ځینو سرونه غوڅ کړل شوي او جسدونه یې غورځول شوي دي.
د ملګرو ملتونو د بشري حقونو د شورا په ځانګړې غونډه کې د اوکراین پر وضعیت هم خبرې وشوې.
له کله چې طالبانو واک ترلاسه کړی، په جوماتونو کې يوشمېر ځانمرګي بريدونه شوي دي.
د ۲۰۲۱ز کال په اکتوبر میاشت کې په کندهار کې د شیعه ګانو پر یوه جومات ځانمرګي برید ۴۷ تنه ووژل.
تر دې وړاندې د اکتوبر د میاشتې په یوه بل ځانمرګي بريد کې چې د کندز د سیداباد په جومات کې وشو، ۱۴۳ تنه ووژل شول.
اسلامي دولت یا داعش وسله والې ډلې خراسان څانګې د دغو بریدونو مسوولیت منلی وو.
دې ډلې د پاکستان د وروستۍ حملې مسوولیت هم په غاړه اخيستی وو.
د روان ۲۰۲۲ز کال د مارچ پر څلورمه د پېښور په رساله دار کوڅه کې د شیعه ګانو پر يو جومات جومات په ځانمرګي بريد کې لږ تر لږه ۶۲ کسان ووژل شول او شاوخوا ۱۵۰ نور ژوبل شول.
د ملګرو ملتونو د بشري حقونو د شورا په دې ځانګړې غونډه کې د طالبانو له لوري د ښځینه فعالانو د بې درکه کېدو یادونه هم وشوه.
