د بلوچستان په پښتون مېشته سيمه هرنايي کې د امنيتي ځواکونو له خوا په ډزو کې د يو کس د وژنې او يوشمېر نورو د ټپي کېدو د پېښې پرضد پرلت پیل شوی دی.
په هرنايي کې د بلوچستان عوامي پارټۍ غړي ملک روح الله ترين د اګست پر ۱۴مه مشال رېډيو ته وويل چې د اګست ۱۳مې او ۱۴ ترمينځ شپې مهال نامعلومو وسله والو د امنيتي ځواکونو پر پوسته بريد وکړ چې وروسته د دواړو غاړو ترمیځ نښته وشوه چې په نتيجه کې يې عام وګړي هم زخميان شول.
د ده په وینا، د اګست د ۱۴مه سهار ځايي اوسېدونکو د کوسټ (خوست) په سيمه کې د پوځي کلا مخې ته د پېښې پرضد احتجاج کاوه چې د ده په ادعا امنیتي ځواکونو ورباندې ډزې وکړې.
د ده په خبره، ځینو احتجاجیانو پر پوځي کلا کاڼې هم وویشتل.
د عوامي نیشنل ګوند د بلوچستان جنرل سېکرټر محبت کاکا چې تر پېښې وروسته له کوټې څخه کوسټ ته رسېدلی، له هغه ځای څخه د اګست پر ۱۴مه مشال رېډيو ته وويل چې د امنيتي ځواکونو په ډزو کې يې د ګوند غړی خالقداد بابړ او ځينې نور کسان زخميان شوي دي.
هغه زیاته کړه چې ګوند يې د دې پېښې پرضد د اګست پر ۱۵مه د بلوچستان په ټولو ضلعو کې د مظاهرو اعلان کړی دی.
د عوامي نیشنل ګوند د هرنايي مشر ولي داد مشال رېډیو ته وويل چې ترڅو د پېښې د پلټنې لپاره عدالتي کمېشن جوړ نه شي تر هغو پورې به دوی احتجاج ته دوام ورکوي.
ځايي خبريال نواب خان د اګست پر ۱۵مه مشال رېډیو ته وويل چې په کوسټ کې پرلتوالو د وژل شوي ځوان مړی خاورو ته له سپارلو انکار کړی او مړی يې د پرلت په ځای کې اېښی دی.
د ده په وينا، احتجایانو له د کوټې او هرنايي ترمينځ سړک هم تړلی دی.
د پاکستان پوځ او صوبايي حکومت د امنيتي ځواکونو په ډزو کې د احتجاجيانو د وژنې په اړه لا څه نه دي ويلي.
موږ په دې اړه د حکومتي دريځ معلوملو لپاره له هرنايي څخه د صوبايي اسمبلۍ له غړي او صوبايي وزیر نور محمد دومړ سره د اګست پر ۱۴مه ماښام مهال د ټېلېفون له لارې د رابطې کوشش وکړ خو هغه ځواب و نه وايه. د دې ترڅنګ مو د هرنايي له ډپټي کمېشنر شفيق ترين سره هم د تماس نيولو هڅې بریالۍ نه شوې.
البته د پاکستان پوځ ویلي دي چې وسله والو د اګست پر ۱۳مه شپې ناوخته د هرنايي په کوسټ (خوست) سیمه کې د ځواکونو پر پوستې برید کړی وو.
د پوځ د عامه اړیکو دفتر (ای اېس پي ار) د اګست پر ۱۴مه ویلي دي چې امنیتي ځواکونو د وسله والو برید شنډ کړ.
په بیان کې راغلي، وسله وال تر حملې وروسته "نېږدې غرونو ته وتښتېدل" او چې ځواکونو یې د "محاصره کولو" هڅه کوله نو په ډزو کې دوه سرتېري قیوم جاوېد او محمد عاطف ووژل شول.
بیان زیاتوي چې د دواړو خواوو ترمینځ په ډزو کې د پوځ یو افسر مېجر عمر ژوبل شوی دی.
خو د بلوچستان اعلاوزير پر پوځي پوسته وسله وال بريد غندلی دی. نوموړي د اګست پر ۱۴مې بیان کې ويلي چې د ده په وينا "ترهګرو" يو ځل بیا په نيمه شپه بريد کړی چې دا د غندنې وړ دی.
تر اوسه معلومه نه ده چې په کوسټ سیمه کې پر پوستې کومې ډلې حمله کړې وه او چا یې ذمه واري هم نه ده منلې.
