د بلوچستان په هرنايي او شاهرګه سیمو کې نن (د جولای پر اتمه) د زیارت د پېښې پر ضد مکمل هړتال دی.
دا په داسې حال کې ده چې وسلوالو د جون پر ۲۶مه د زیارت په مانګي سیمه کې په سکرو بار ۱۱ ټرکونه سوځولي وو او وروسته یې د هرنايي د مرستیال کمېشنر پر ګاډي ډزې هم کړې وې.
د هړتال له مخه په دواړو سیمو کې نن ټول دوکانونه او کاروباري مرکزونه بند دي.
د هرنايي عوامي اتحاد وايي چې په سیمه کې بدامني ده، وسلوال ترې د کویلې پر سر قلنګ غواړي، نو حکومت دې د امنیت لپاره ګامونه واخلي او د کویلې صنعت سره تړلو کاروبارکوونکو او تجارت ته دې تحفظ ورکړي.
دوی وايي چې د زیارت د پېښې ککړ کسان دې و نیسي او چا ته چې نقصان رسېدلی د هغوی مرسته دې وشي.
د هرنايي عوامي اتحاد چې پکې سیاسي ګوندونه، ځايي مشران او تاجران شامل دي، دړکه کړې چې تر څو حکومت د دوی لپاره حفاظتي ګامونه پورته نه کړي، تر هغې به خپل احتجاج ته دوام ورکوي.
د بلوچستان په هرنایي کې د سکرو او نورو معدنیاتو کانونه دي. هلته وخت پر وخت د ناامنۍ پېښي کېږي چې امنیتي سرتېري او عام وګړي پکې په نخښه کېږي چې پر ضد یې مخکې هم مظاهرې شوې دي.
د جون پر لومړۍ نېټه هم د هرنايي په چپرفټ سیمه کې وسله والو د کویلې ۴۲ ټرکونه په نښه کړي او هغوی ته یې زیان رسولی وو. د هغې پېښې زمه واري هم بلوڅ بېلتون غوښتونکې ډلې بلوچستان لیبرېشن ارمي منلې وه.
د بلوچستان په هرنايي کې د کویلې يا سکرو کاروبار کوونکو او د سامان وړونکي ټرانسپورټ اتحادیو د هغې پېښې پرضد احتجاج او هړتال کړی وو.
دوی تور پورې کړی وو چې د بلوچستان حکومت د ولس د ژوند او مال په خوندي ساتلو کې پاتې راغلی او او کاروباریان یې له پامه غورځلي دي.
د زیارت د پېښې ذمه واري بلوڅ وسله والې ډلي بلوڅ لیبریشن ارمي قبوله کړې وه. تر اوسه د هغه پېښې په تړاو څوک نه دي نیول شوې.
په خیبر پښتونخوا او بلوچستان کې د ۲۰۲۲ز کال له اوړي راهیسې ناامني زیاته شوې چې پرضد یې ولسي خلکو پراخ احتجاجونه، جرګې او لاریونونه کړي دي.
د پاکستان حکومت وایي د بلوچستان په ګډون له ټول هېواده به "ترهګري په بشپړه توګه" ختموي. وزیراعظم شهباز شریف د مې پر ۲۲مه په کوټه کې یوې غونډې ته وویل، د پخوا پرتله په بلوچستان او په ټول پاکستان کې امنیت ښه شوی دی خو زیاته یې کړه چې امنیتي سرتېرو هلته د وسلوالو پرضد مبارزې ته دوام ورکړی دی.
