د خيبر پښتونخوا د ټانک انتظامي مشر وايي، په هغه ضلع کې يې د فبرورۍ اتمې د عامو انتخاباتو لپاره تياری مکمل کړی دی.
محمد شعيب د جنورۍ پر۱۴مه مشال راډيو ته وويل، د رايو مرکزونه يې ټاکلي، د هغوی د امنيت لپاره یې اقدامات کړي او د انتخاباتي عملې د روزنې چارې يې هم پيل کړي دي.
د شعیب په خبره، د انتخاباتي لګښتونو لپاره يې له صوبايي حکومته پيسې غوښتې دي او د ضلعې دننه يې بېلابېلو حکومتي ادارو ته خواست کړی دی چې د انتخاباتو په ښه توګه کولو لپاره له انتظامیې سره مرسته وکړي.
د فبرورۍ پر اتمه په ټانک کې د قامي اسمبلۍ د ۴۳مې او د صوبايي اسمبلۍ د ۱۰۸مې حلقو د څوکیو ډکولو لپاره انتخابات کېږي.
د هغو حلقو ځینو نوماندانو مشال راډيو ته ويلي دي چې د سيمې د امنيت او ترقۍ په نوم له خلکو رای غواړي. هغه نوماندان پر حکومت او انتخاباتي کمېشن غږ کړی چې د ټاکنو شفافیت باوري کړي.
