د پاکستان پوځ د بلوچستان په پښتون مېشته سیمه ژوب کې د اووه مشکوکو وسلوالو د وژنې دعوه کړې ده.
د پاکستاني پوځ د عامه اړیکو څانګې (ای ایس پي ار) د جنورۍ پر ۲۲مه په یو خبرپاڼه کې ویلي چې سرتېرو د ژوب په سمبازه سیمه کې د استخباراتي معلوماتو پر اساس عملیات وکړل چې پکې هغه مشکوک وسلوال ووژل شول.
بیان زیاتوي چې وژل شوي کسان په سیمه کې د "ترهګرۍ" تر څنګ پر عامو وګړو په بریدونو کې هم ککړ ول.
خو پوځ دا نه دي ویلي چې هغه وسلوال د کومې ډلې ول. تر اوسه پورې کومې وسلوالې ډلې هم په دې اړه څه نه دي ویلي.
مشال راډیو په خپلواکه توګه د ای اېس پي ار د دعوې تصدیق نه شي کولای خو د پاکستان پوځ تر دې مخکې هم په ژوب کې په عملیاتو کې د مشکوکو وسلوالو د وژلو دعوې کړې دي.
ای اېس پي ار تر دې مخکې د اکتوبر پر ۳۱مه شپې ناوخته په ژوب کې د استخباراتي معلوماتو پر اساس په عملیاتو کې د شپږو مشکوکو وسلوالو د وژنې خبر ورکړی وو.
پوځ تر دې مخکې د اکتوبر پر نهمه هم په ژوب کې د وسلوالو د وژنې خبر ورکړی وو او ویلي یې ول چې هغوی د عملیاتو پر مهال ورباندې برید وکړ چې له کبله یې نښته پیل شوه چې پکې یو مېجر او یو حوالدار او پینځه مشکوک وسلوال وژل شوي ول.
تحريک طالبان پاکستان د هغه بريد ذمه واري منلې وه او په بیان کې یې دعوه کړې وه چې په نښته کې یې وسلوالو ته زیان نه وو اوښتی.
د ۲۰۲۳ز کال د اوړي له پیل راهیسې په خیبر پښتونخوا او بلوچستان کې امنيتي حالات خراب شوي او وسلوالو په بېلابېلو ځایونو کې بریدونه کړي دي.
خو د پاکستان پوځ او پولیس وايي چې د وسلوالو پرضد یې هدفي عملیاتو ته دوام ورکړی دی.
د پاکستان لنډمهالي وزیراعظم انوار الحق کاکړ د جنورۍ پر ۱۱مه په پېښور کې پولیسو ته په وینا کې وویل چې وسلوالو ته سخت ځواب ورکوي او پرضد به یې مبارزه روانه وي.
