په بلوچستان کې څلورو ګوندونو د فبرورۍ اتمې په ټولټاکنو کې د درغلۍ او د نتیجو بدلولو تور پورې کړی او پرضد یې د احتجاجي تحریک پیلولو اعلان کړی دی.
د فبرورۍ پر ۱۰مه په کوټه کې د بلوچستان نیشنل پارټۍ (مېنګل)، نیشنل پارټۍ، پښتونخوا ملي عوامي ګوند او هزاره ډېموکریټېک پارټۍ مشرانو او سیاستوالانو غونډه وشوه.
د بلوچستان نیشنل پارټۍ (مېنګل) سیاستوال او پخواني سېنېټر ثنا بلوڅ تر غونډې وروسته پر اېکس په بیان کې ویلي دي چې څلورواړه ګوندونو پرېکړه کړې ده چې د ټاکنو د نتیجو بدلولو پر ضد "ګډ احتجاجونه" پیل کړي او د ځنډولو لپاره یې عدالتونو ته ولاړ شي.
بلوڅ ویلي چې هغو ګوندونو فیصله کړې چې د بلوچستان اسمبلۍ وداني محاصره کړي او ورته د "جعلي ګوډاګیو" استازو د ورتګ مخه نیسي او داراز، د بلوچستان موازي یا متوازي اسمبلي جوړوي چې غړي به یې د صوبې د "ولس اصلي استازي" وي.
نوموړي زیاته کړې ده چې هغو ګوندونو پرېکړه کړې چې د بلوچستان په سیاسي چارو کې د "اېسټیبلېشمنټ لاسوهنې پر ضد ولسي غورځنګ" پیل کړي.
په پاکستان کې د اېسټېبلېشمنټ اصطلاح اکثر د پوځي او امنیتي ادارې لپاره کارېږي چې تر اوسه یې د هغو ګوندونو د دعوو په غبرګون کې څه نه دي ویلي خو تر دې مخکې یې په بیا بیا ټینګار کړی دی چې په سیاسي چارو کې مداخله نه کوي.
د پاکستان انتخاباتي کمېشن هم لا د بلوچستان مېشتو ملتپاله ګوندونو د تحریک پیلولو او د ټاکنو په نتیجو کې د درغلیو تورونو په عکس العمل کې څه نه دي ویلي خو د هغې خپلواکه ادارې مشر سکندر سلطان راجا د فبرورۍ پر اتمه ویلي ول چې انتخاباتي بهیر په بشپړه توګه "شفاف او منصفانه" وو.
کمېشن داراز وايي چې که څوک د پایلو په اړه شکایتونه لري نو عدالت ته دې ولاړ شي.
له دې پرته د پاکستان د کورنیو چارو لنډمهالي وزیر ګوهر اعجاز د فبرورۍ پر نهمه په اسلام اباد کې د خبري غونډې پر مهال د ټاکنو بهیر په اړه وویل چې که نګران وفاقي حکومت سم نیت نه لرلای نو د عامو انتخاباتو نتیجې به تر اوسنیو هغو بدلې وای.
د کورنیو چارو لنډمهالي وزیر زیاته کړه چې د فبرورۍ پر اتمه شپې مهال او د فبرورۍ پر نهمه په اعلان شویو انتخاباتي پایلو کې زیات توپیر نه شته.
دا په داسې حال کې ده چې یوشمېر ګوندونو د فبرورۍ پر ۱۰مه هم د بلوچستان په مختلفو ښارونو کې د ټولټاکنو د پایلو ځنډېدو پرضد احتجاجونه وکړل.
د پښتونخوا ملي عوامي ګوند، بلوچستان نیشنل پارټۍ (مېنګل)، بلوچستان نېشنل عوامي ګوند، عوامي نیشنل ګوند، جمعیت علمای اسلام (ف) او پیپلز ګوند مخکښه مشرانو او غړو د فبرورۍ پر ۱۰مه په بېلابېلو ښارونو کې د مظاهرو پر مهال تور پورې کړ چې په انتخاباتو کې ټګي شوې ده.
انتخاباتي کمېشن دریځ لري چې ټاکنې شفافې وې او وايي چې په بلوچستان کې د رایو ورکولو مرکزونه له یو بله ډېر لیرې ول نو ځکه نتیجې وځنډېدې.
