د خیبر پښتونخوا په مرکز پېښور کې په یوه کور کې د ګېس سلېنډر چاودېدو له امله درې کسان وژل شوي دي.
د مرستندويه او ژغورنې چارو اداره (ریسکیو ۱۱۲۲) وایي چې پېښه د فبرورۍ پر ۱۶مه د ګلبهار په اعجاز اباد سیمه کې شوې ده.
د چاودنې له امله د کور چت راپرېوتی دی چې یو سړی، یوه ښځه او یو ماشوم تر لاندې شوي دي.
د وژل شويو کسانو مړي له ملبې ایستل شوي او روغتون ته وړل شوي دي.
په پاکستان کې مخکې هم دا ډول چاودنې شوي چې مرګژوبله یې اړولې ده. د ۲۰۲۳ز کال د جون پر ۲۴مه، د پېښور پر کوهاټ روډ په یو کور کې دننه د ګېس سلېنډر په چاودنه کې درې ماشومان وژل شوي او دوه کسان ژوبل شوي ول.
