د بلوچستان په دوکۍ کې جمعیت علمای اسلام (ف) د خپل ضلعي مشر مولانا عبدالجبار د وژنې ضد کاربندیز کړی دی.
د جون پر دویمه د کاربندیز پر مهال ټول دوکانونه او کاروباري مرکزونه تړل شوي دي او پر سړکونو د موټرو تګ راتګ کم دی.
چارواکي وايي چې مولانا عبدالجبار د جمعې پر ورځ په دوکۍ کې د مشکوکو غلو په ډزو زخمي شوی وو او د جون پر لومړۍ یې د کوټې په یوه روغتون کې سا ورکړه.
د ګوند غړو او پلویانو د جون پر لومړۍ په دوکۍ کې احتجاج هم کړی وو. د جمعیت یو سیمه ییز مشر امیر مولانا قاسم لوڼي غوښتنه وکړه چې ضلعي چارواکي د امنیت په ساتلو کې پاتې راغلي او حکومت دې یې پر ضد ګامونه پورته کړي.
د دوکۍ انتظامي مشر (ډېپټي کمېشنر) کلیم الله مشال راډیو ته وویل چې د پېښې په تور یې شپږ مشکوک کسان نیولي دي او پلټنې ترې کوي.
هغه وویل، د امنیت ټینګښت لپاره یې د ضلعي چارواکو غونډه د جون په درېیمه غوښتې ده. په غونډه کې به د ضلع امنیت وضعیت وڅېړل شي.
دوکۍ د بلوچستان په شمال ختیځ کې پښتون مېشتې ضلع ده چې له مرکز کوټې څخه شاوخوا ۲۲۳ کېلومیټره لیرې ده.
