د ۲۰ اووره کرکټ نړیوال جام په سیالیو کې د بنګلادېش او نېدرلینډز (هالینډ) او د انګلستان (انګلینډ) او عمان لوبډلې یو بل ته مخامخېږي.
د وېسټ انډیز په ارنوس وېل لوبغالي کې د بنګلادېش او نېدرلینډز ترمینځ سیالي د جون پر ۱۳مه د پېښور پر وخت د ماښام پر اووه نیمو او د کابل پر اووه بجو پیلېږي. تر دې وروسته د ښاغلي وېوېین رېچرډز په لوبغالي کې د انګلستان او عمان ترمینځ لوبه د پېښور پر وخت د شپې پر ۱۲ او د کابل پر ۱۱:۳۰ بجو پیلېږي.
تر دې مخکې د جون پر ۱۳مه په لومړۍ سیالۍ کې وېسټ انډیز نیو زیلینډ ته په ۱۳ منډو ماتې ورکړه.
د ټرېنېډاډ او ټوبېګو په براین لارا لوبغالي کې لومړی بیټېنګ کوربه نیو زیلینډ وکړ او په ټاکلیو ۲۰ اوورونو کې یې د نهو لوبغاړو په زیان ۱۴۹ منډې وکړې. په ځواب کې نیو زیلینډۍ لوبډلې په ۲۰ اوورونو کې د نهو لوبغاړو په سوځېدو ۱۳۶ منډې وکړای شوې.
د جون پر ۱۲مه هند د نیو یارک په لوبغالي کې د امریکا لوبډلې ته په اووه وېکټو ماتې ورکړه.
د جون پر ۱۴مه دوه سیالۍ کېږي چې پکې په لومړۍ کې یې د افغانستان او پاپوا نیو ګېني او ورپسې د امریکا او ایرلینډ لوبډلې یو بل ته مخامخېږي.
د کرکټ ۲۰ اووره نړيوال جام سیالۍ د جون له دویمې راهیسې په امریکا او وېسټ انډیز کې روانې دي چې پکې ۲۰ لوبډلې برخه لري. ټاکل شوې چې د جام پایلوبه د جون پر ۲۹مه په باربېډوس کې وشي.
