د بلوچستان د شېراني ضلعې په دانه سر سیمه کې د مساپرو بس چپه شوی دی چې پکې لږ تر لږه پینځه کسان وژل شوي او شا و خوا ۲۰ ژوبل دي.
د ژوب سېول روغتون مشر ډاکټر اختر محمد مشال راډیو ته وویل چې پېښه د سېپټېمبر پر ۱۴مه شوې ده. د ده په خبره، ځینې مړي او ژوبل کسان روغتون ته وروړل شوي دي.
بس له اسلام اباد څخه کوټې ته د ډېره اسماعیل خان په لویه لاره روان وو چې کندې ته ولوېد.
د بلوچستان حکومت ویاند شاهد رند له رسنیو سره په خبرو کې ویلي چې د حادثې وجوهات معلوموي او ټول ژوبل کسان د لیویز او پولیسو په ګاډو کې ژوب روغتون ته وړل شوي دي.
په پاکستان کې ټرافیکي پېښې زیاتره د قوانینو نه عملي کېدو، د سړکونو خرابوالي، د ډرېورانو بې احتیاطۍ، او د ګاډو پر ټاکلي وخت د مرمت او معاینې نه کولو له وجې کېږي، چې پکې ګڼو کسانو ته مرګ ژوبله اوړي.
