د لبنان په جنوب کې د اسراییلو او د ایران ملاتړ لرونکې ډلې حزب الله تر مینځ تر شاوخوا ۱۴ میاشتنۍ جګړې وروسته د اوربند موافقه عملي شوې ده.
حزب الله یوه وسلواله ډله او سیاسي ګوند دی چې د لبنان د جنوب ډېری برخې کنټرولوي او د هېواد په پارلېمان کې هم استازي لري.
امریکا حزب الله یوه ترهګره ډله بولي خو اروپايي ټولنې یې یوازې وسلواله څانګه د بندیزونو په نوملړ کې شامله کړې ده.
اسراییلي وزیراعظم بنیامین نتنیاهو د نومبر پر ۲۶مه وویل چې کابینې یې له حزب الله سره د اوربند موافقه منظوره کړه.
د اسراییلو او حزب الله تر مینځ جګړې په سیمه کې د پراخ تاوتریخوالي اندېښنې زیاتې کړې وې او ترمینځ د سولې پر لوري لوی پرمختګ ښيي.
اوربند پر سیمه ییز وخت سهار څلور بجې پیل شو، خو اسراییلي پوځ ملکي وګړو ته خبرداری ورکړ چې د لبنان په جنوبي سیمو کې دې خپلو کورونو ته نه ستنېږي او د اسراییلیو ځواکونو پوستو ته دې نه نېږدې کېږي.
البته پر دې سربېره د ملکي وګړو کاروانونه د لبنان جنوبي برخو ته داخل شول. دا په داسې حال کې ده چې د اسراییلو ځواکونو پر ځای د لبنان پوځیان لا هم په سیمه کې ځای پر ځای دي.
د اسراییلي وزیراعظم دفتر د نومبر پر ۲۶مه په بیان کې وویل چې د اوربند د موافقې پلان د یوې منفي رایې پر وړاندې په ۱۰ مثبتو رایو منظوره شوه.
امریکايي ولسمشر جو بایډن سمدستي د اوربند هرکلی وکړ او و یې ویل چې هغه لبنان ته یو نوی پیل برابروي او څرګندوي چې تر هغې ۱۴ میاشتنۍ جګړې وروسته هم سوله ممکنه ده چې پکې زرګونه لبنانیان ووژل شول او په لسګونو زره اسراییلي وګړي یې بې کوره کړل.
نتنیاهو تر دې مخکې د امریکا په مینځګړتوب د اوربند د هغې موافقې دفاع کړې وه او پر خپلې امنیتي کابینې یې ټینګار کړی وو چې منظوره یې کړي. خو هغه ژمنه کړې چې که حزب الله د جوړجاړي سرغړونه وکړي نو "سخت به یې وځپي."
اسراییلي وزیراعظم په ټېلېوېژني وینا کې د اوربند د مودې په اړه وضاحت نه دی کړی خو زیاته یې کړه چې د جنګ بندۍ وخت په دې پورې اړه لري چې په لبنان کې څه کېږي.
حماس، چې امریکا او اروپايي ټولنه یې ترهګره ډله بولي، د ۲۰۲۳ز کال په اکتوبر کې پر اسراییلو بېساری او خونړۍ برید وکړ. تر هغې وروسته اسراییلو په غزې تړانګه کې جګړه پیل کړه او بیا یې په لبنان کې د حزب الله پر وړاندې عملیات پیل کړل او دا راز یې په سوریې (شام) کې هم د اسلامي جهاد ډلې پرضد حملې کړې دي.
په همدې حال کې حزب الله هم پر اسراییلو د توغندیو حملو ته دوام ورکړی وو چې له وجې یې په زرګونو اسراییلیان بې کوره شوي ول.
