چارواکي وايي، د بلوچستان په مستونګ ضلع کې په بمي چاودنه کې درې پولیس وژل شوي او لږترلږه ۱۶ ژوبل شوي دي.
د بلوچستان حکومتي وياند شاهد رند په يو بيان کې ويلي دي چې د اپرېل پر ۱۵مه سهار د مستونګ له کنډ مسوري سيمې سره نېږدې پر دشت سړک د بلوچستان کانسټېبلري پوليسو پر بس د ماين چاودنه وشوه چې په نتيجه کې يې درې پوليس ووژل شول او ۱۶ ژوبل شول.
نوموړي زياته کړه چې دغه پوليس سرتېري د دندې لپاره په بس کې روان ول چې ښخ شوی بم ورباندې وچاودېد.
د بمي بريد ذمه واري لا چا نه ده منلې خو د مستونګ پوليس چارواکي وايي چې پولیسو د پېښې پلټنې پیل کړې دي.
په وروستیو میاشتو کې په بلوچستان کې یوشمېر وسلوال بریدونه او چاودنې شوې دي چې پکې امنیتي سرتېرو او ولسي وګړو ته مرګژوبله اوښتې ده.
د اپرېل پر نهمه د بلوچستان په مرکز کوټه کې په وسلوال برید کې درې پولیس وژل شوي او یو ژوبل شوی وو.
د مارچ پر ۲۹مه په مستونګ کې د بلوچستان نیشنل ګوند په مشرۍ د بلوڅ فعالانو د ګرفتاریو پر ضد د لاریون پر مهال ځانمرګی برید وشو چې پکې دوه تنه ژوبل شول.
د مارچ پر ۲۷مه په کوټه کې د پولیسو له ګاډي سره نېږدې په چاودنه کې درې تنه ووژل شول او شاوخوا ۲۱ ژوبل شول.
تر دې مخکې د مارچ پر ۲۵مه او ۲۶مه په ګوادر، مستونګ او کېچ کې په بېلا بېلو برخو کې په حملو او د تاوتریخوالي په پېښو کې د پولیسو د ترهګرۍ ضد څانګې (کاونټر ټېررېزم ډېپارټمنټ یا سي ټي ډي) او لېویز ځواک د دوو سرتېرو په ګډون لږ تر لږه ۱۲ تنه ووژل شول.
داراز، د مارچ پر ۲۲مه وسلوالو په بلوڅ مېشتو نوشکي او قلات کې په دوو حملو کې څلور پولیس او څلور مزدوران ووژل.
د هغو حملو مسوولیت هم چا نه وو منلی.
تر هغې وړاندې د یوې اونۍ په موده کې د کوټې، بولان او نوشکي په ګډون د صوبې په ډېریو برخو کې وسلوالو بریدونو ګڼو سرتېرو ته مرګژوبله واړوله.
په بولان کې د جعفر اېکسپرېس په نوم پېښور ته پر لاره پر مساپر لېږدوونکي اورګاډي د برید او د سرتېرو او استخباراتي کارکوونکو په ګډون د خلکو د یرغمل کولو او په نوشکي کې د امنیتي سرتېرو پر قافلې د وروستۍ حملۍ ذمه واري بېلتونپالې بلوچ لېبرېشن ارمي (بي اېل اې) ډلې منلې وه.
په همدې حال کې د پاکستان پوځ او حکومت په بیا بیا ټینګار کوي د بلوچستان په ګډون په ټول هېواد کې د وسلوالو پرضد مبارزې ته دوام ورکوي.
د پاکستان حکومت وايي، د ترهګرۍ پر ضد مبارزې ته ژمن دی. ولسمشر اصف علي زرداري د مارچ پر ۲۳مه په اسلام اباد کې یوې غونډې ته وویل چې "ملت او امنیتي ادارې د ترهګرۍ پرضد "یو موټی" دي او وسلوالې ډلې خپلو "شومو موخو" ته رسېدو ته نه پرېږدي.
داراز، د مارچ پر ۱۸مه د پاکستان د ملي امنیت کمېټۍ د وزیراعظم شهباز شریف په مشرۍ په غونډه کې ټینګار وکړ چې دولت (ریاست) دې په "پوره ځواک ترهګرۍ" ته ځواب ووايي.
