د پاکستان انتخاباتو کې څومره نوماندان برخه اخلي؟
- لیکوال/لیکواله ملیحه امیرزاده
د پاکستان د قامي اسمبلۍ د عمومي څوکیو لپاره د ۵،۱۲۱ نوماندانو ترمینځ سیالي روانه ده چې له هغو څخه یې ۳۱۲ ښځې، دوه نرښځیان او پاتې سړي دي.
داراز، د څلورو صوبايي اسمبلیو د ۵۹۰ څوکیو ډکولو لپاره د ۱۲،۶۹۵ امېدوارانو ترمینځ سیالي ده چې ورڅخه یې ۵۷۰ ښځې، دوه نرښځیان او پاتې سړي دي.
انتخابات: د قامي او صوبايي اسمبلیو څوکیو شمېر
- لیکوال/لیکواله ملیحه امیرزاده
په پاکستان کې د قامي اسمبلۍ ۲۶۶ عمومي څوکۍ دي چې ورڅخه یې پر ۲۶۵ انتخابات روان دي او پر یوې څوکۍ ټاکنې ځنډول شوې دي.
له دې پرته د خیبر پښتونخوا د اسمبلۍ له ۱۱۵ څخه د ۱۱۳ څوکیو ډکولو لپاره د رایې اچونې بهیر روان دی. داراز، د پنجاب د ۲۹۷، د سیند ۱۳۰ او د بلوچستان اسمبلۍ له ۵۱ څخه پر ۵۰ څوکیو ټاکنې دوام لري.
په پاکستان کې د موبایل ټېلېفون خدمات ځنډول شوي دي
په داسې حال کې چې په پاکستان کې د رایې اچونې بهیر روان دی، د هغه هېواد په زیاتره برخو کې د موبایل ټېلېفون او انټرنېټ خدمات تړل شوي دي.
د پاکستان پیپلز ګوند مشر بلاول بوټو زرداري د فبرورۍ پر اتمه پر اېکس په بیان کې پر حکومت غږ وکړ چې د موبایل ټېلېفون خدمات دې ژر تر ژره بحال کړي.
د پاکستان رسنۍ وايي چې پیپلز ګوند د انتخاباتو پر مهال د موبایل ټېلېفون خدماتو ځنډولو پرضد د هېواد انتخاباتي کمېشن ته درخواست ورکړی دی.
اخوا د کورنیو چارو وزارت د فبرورۍ پر اتمه په بیان کې ویلي چې د موبایل ټېلېفون او انټرنېټي خدمات یې د امنیت ټینګښت لپاره ځنډولي کړي دي.
وزارت ویلي دي چې دا کار یې په وروستیو کې په هېواد کې د ترهګرۍ پېښو ته په کتو کړی دی.
دا په داسې حال کې ده چې د بخښنې نړیوال سازمان (ایمنسټي انټرنیشنل) د فبرورۍ پر شپږمه د حکومت او انتخاباتي کمېشن په نوم په پرانیستي لیک کې غوښتنه وکړه چې د انتخاباتو پر مهال دې په هېواد کې انټرنېټي خدمات فعال وساتي.
د سازمان تر غوښتنې یوه ورځ وروسته پاکستانیو رسنیو د مخابراتي چارو ادارې (پاکستان ټېلېکمیونیکېشن اتارټي یا پي ټي اې) په حواله وویل چې چې په هغه هېواد کې به انټرنېټي خدمات نه ځنډوي.
