د انګور اډې اوسېدونکو له انتخاباتو پرېکون کړی دی
د خیبر پښتونخوا د جنوبي وزیرستان د انګور اډې سیمې د فبرورۍ اتمې له انتخاباتو پرېکون کړی وو او رایې یې و نه کارولې.
د سیمې اوسېدونکي وايي چې د ۲۰۲۳ز کال د نومبر له ۱۲مې راهیسې یې د خپلو ۱۸ غوښتنو پوره کېدو لپاره پرلت وهلی دی خو حکومت پوره نه کړې نو ځکه یې له ټاکنو پرېکون وکړ.
پرلتوالو د جنورۍ پر ۲۷مه ویلي ول چې که حکومت یې غوښتنې پوره نه کړي نو په انتخاباتو کې رایې نه کاروي.
د هغوی په غوښتنو کې د پاکستان او افغانستان تر مينځ د انګور اډې پر لاره د پاسپورټ او ويزې شرط ختمول، د امنیت ټینګښ، خلکو ته د تعلیم او روغتيا اسانتياوې ورکول، د انټرنېټ او موبایل ټېلېفون شبکو بحالول او پاخه سړکونه جوړول شامل دي.
د انګور اډې یو اوسېدونکي جنت میر مشال راډیو ته وویل چې د غوښتنو تر منلو پورې به یې احتجاج دوام لري. "نن د فبرورۍ اتمه ده خو موږ ووټونه وا نه چول. زموږ احتجاج به د غوښتنو تر منل کېدو پورې روان وي."
د انتخاباتي کمېشن چارواکو او د جنوبي وزیرستان انتظامیې د انګور اډې د اوسېدونکو د پرېکون په اړه څه نه دي ویلي.
خو د کوز جنوبي وزیرستان ډېپټي کمېشنر محمد ناصر خان د فبرورۍ په پیل کې مشال راډیو ته ويلي ول چې د پرلت له مشرانو سره یې د مسلو د هواري لپاره خبرې اترې روانې دي.
په پاکستان کې د قامي او صوبایي اسمبلیو انتخابات ترسره شول
- لیکوال/لیکواله ګل ایاز
په پاکستان کې د فبرورۍ اتمې په عامو انتخاباتو کې د رايې کارونې بهير د مازيګر پر پينځه بجې پای ته رسېدلی دی او په ځینو پولېنګ سټېشنونو کې د ووټونو شمېرلو عمل پيل شوی دی خو د ووټ اچولو په هغو مرکزونو کې به وروسته پیلېږي چې پکې لا هم خلک د رایې کارولو په انتظار دي.
په هغه هېواد کې د رايې کارونې بهير سهار اته بجې پيل شوی وو.
په دې اړه تفصیل په ويډيويي رپورټ کې وګورئ.
د رایې اچونې بهیر ختمېدو په اړه ژوندۍ ویډیويي خپرونه
په پاکستان کې په پارلېماني انتخاباتو کې د رایې اچونې بهیر پای ته رسېدلی دی البته د پولېنګ سټېشنونونو دننه منتظر کسان کولای شي چې خپلې رایې وکاروي.
په هغه هېواد کې انتخابات د فبرورۍ پر اتمه د پېښور له وخت سره سم سهار پر اتو بجو پیل شوي ول.
د بهیر ختمېدو په اړه د مشال راډیو څلورمه ژوندۍ ویډیویي خپرونه پر فېسبوک دلته وګورئ او داراز یې لاندې پر یوټیوب هم لیدلای شئ.
پېښور کې د رایې اچونې بهیر روان دی
- لیکوال/لیکواله ګل ایاز
په پېښور کې د فبرورۍ پر اتمه سهار مهال په پولېنګ سټېشنونو کې د خلکو شمېر کم وو خو له وخت تېرېدو سره ګڼه ګوڼه زیاته شوه.
په دې اړه تفصیل په ویډیويي رپورټ کې.
