د چمن پرلت په ملاتړ او نورو غوښتنو لپاره پي ټي اېم له چمنه تر کوټې پيل کړی لاریون دوام لري.
د غورځنګ لسګونه پلویانو دا لاریون د نومبر له ۱۷مې پیل کړی دی. لاریون کوونکي د چمن او سپین بولدک ترمینځ د ازاد تګ راتګ د ملاتړ ترڅنګ له پاکستانه د بې اسناده افغان کډوالو په زوره د نه ایستلو او د غورځنګ د نیول شوي کسانو د خوشې کولو غوښتنه کوي.
په لاریون کې شریک د غورځنګ یو مخکښ ذوالقرنین باچا د نومبر پر ۱۸ مه مشال راډیو ته وویل، د خپل مزل دویم پړاو یې د کلا عبدالله له ژړي بند سیمې څخه پېل کړی او هدف یې دادی چې حکومت یې غوښتنې ومني: "له پاکستانه د افغان کډوالو په زور ویستلو غندنه کوو او پر ډیورنډ کرښه دواړو غاړو مېشت خلکو ته دې دوه تابعیته (د پاکستان او افغانستان تابعیت) ورکړل شي او د غورځنګ نیول شوي ملګري دې خوشي شي."
دا په داسې حال کې ده چې په چمن ښار کې د پاسپورټ او ویزې لازمي کېدو پرضد پرلت دوام لري.
د تاجرانو اتحاديې او سياسي ګوندونو دا پرلت د اکتوبر پر ۲۱مه پيل کړی او غوښتنه کوي چې د چمن او سپين بولدک ترمينځ پر سرحدي دروازه دې د پخوا په شان پر پاکستاني شناختي کارډ او افغان تذکرې د تګ راتګ اجازه ورکړل شي.
د بلوچستان چارواکو د نومبر له پیل راهیسې پر چمن بې له پاسپورټ او ویزې تګ راتګ درولی دی او وایي چې دا ګام یې په هېواد کې د امنیت ساتلو او قاچاق د مخنیوي په خاطر اخیستی دی.
