د جنوبي اسیا د سیمه ییزې همکاریو سازمان (سارک) غړو هېوادونو افغانستان ته د سازمان نوبتي مشرولي نه ده سپارلې.
هنديو او پاکستانيو رسنيو د مارچ پر ۱۲مه د خپلو سرچينو په حواله ويلي چې سارک دا پرېکړه له دې کبله کړې چې په افغانستان کې د طالبانو حکومت په رسمیت نه پېژني.
د سارک مشر د درو کلونو لپاره ټاکل کېږي او له تېرو درو کلونو راهیسې یې مشري له سري لنکا سره ده. دا ځل د افغانستان نوبت وو خو د هند اېشیا نيوز انټرنيشنل خبري اژانس ليکلي چې پر ځای یې مشري، بنګلادېش ته ورکړل شوه. خپله سارک لا د نوي مشر د ټاکلو رسمي اعلان نه دی کړی.
د پاکستان د انګرېزۍ ژبې نېشن ورځپاڼې لیکلي چې د نیپال د بهرنیو چارو سېکرټر برت راج پودل چې د دې سازمان د دارالانشا مشري کوي، په دې اړه له غړو هېوادونو سره خبرې کړې وي چې تر هغه وروسته یې د بنګلادېش ډېپلوماټ غلام سرور ته د سارک د مشرۍ چارې وسپارلې.
طالبانو د ۲۰۲۱ز کال د اګست پر ۱۵مه په زور په افغانستان کې حکومت ونيو. د نړۍ هېڅ هېواد د دې ډلې حکومت په رسميت نه دی پېژندلی. له همدې کبله، په ملګرو ملتونو کې هم د افغانستان استازيتوب څوکۍ طالبانو ته نه ده سپارل شوې.
د طالبانو حکومت تر اوسه په سارک کې د نوي بدلون په اړه څه نه دي ويلي.
په ۲۰۲۱ز کال کې د سارک سازمان غړو هېوادونو غونډه له دې امله وځنډول شوه چې پاکستان ټينګار درلود چې د افغانستان استازیتوب لپاره دې طالبان وربلل شي. خو نورو غړيو هېوادونه دا نه منله. دا ځل افغانستان ته د دې سازمان د مشرۍ څوکۍ د نه سپارلو سره په ښکاره ډول د پاکستان په ګډون هېڅ هېواد مخالفت نه دی کړی.
سارک په ۱۹۸۵ز کال کې جوړ شوی وو. دا سازمان د غړو هېوادونو ترمنځ د اقتصادي راکړې ورکړې، په بيړنيو حالاتو کې د مرستې، تعليم او پرمختیايي چارو کې همکاري کوي.
افغانستان، نيپال، هند، سري لنکا، مالديپ، بنګلادېش، بوټان، او پاکستان د سارک سازمان غړي دي.
اسټرالیا، چین، ایران، جاپان، مورېشس، برما، جنوبي کوریا، اروپایي ټولنه او امریکا په سازمان کې د څارونکو حیثیت لري.
