امریکايي ولسمشر جو بایډن ویلي دي چې پر روسیې د بندیزونو لومړۍ برخه عملي کوي.
نوموړي د فبرورۍ پر ۲۲مه ولس ته په وینا کې وویل، د مسکو اقدامات د نړیوال قانون سرغړونه ده چې له کبله یې پر دوو روسیو بانکونو د بندیزونو ترڅنګ د غربي هېوادونو مالي ادارو ته د مسکو پر لاسرسي بندیز لګوي.
نوموړي وویل، د اوکراين په اړه د روسي ولسمشر ولاديمير پوتين ادعاوې یې نه شي تېر ايستلای.
د بایډن په وينا، که روسيه خپل "تېري" ته دوام ورکړي نو نور بندېزونه ورباندې لګېدلای شي. نوموړي دا خبره د پوتين د هغه ذکر شوي پلان په حواله وکړه چې د اوکراين له ختيځ ور اخوا سيمو ته به پوځیان استوي.
امریکا تر هغې وروسته دا اقدامات اعلان کړي چې د روسیې ولسمشر ولادیمیر پوتین د فبرورۍ پر ۲۲مه خپلو ځواکونو ته امر وکړ چې د اوکراین په ختیځ کې دې هغو سیمو ته ورداخل شي چې پکې روسي پلوي بېلتونپالي فعالیت کوي. پوتین تر دې څو ساعته مخکې د اوکراین په ختيځ کې د دوو بېلتونپالو سیمو دنېڅک او لوهانسک خپلواکي په رسمیت وپېژندله. د روسيې ملاتړ لرونکي بېلتونپال د اوکراين پر ختيځو سيمو د کنټرول ادعا لري.
ولسمشر بايډن ولس ته په وينا کې زیاته کړه چې دا اقدام پر اوکراين د روسيې د بريد پيل دی. نوموړي وويل چې پوتين د لا زياتو سيمو د نيولو لپاره دلايل لټوي.
يوه لوړپوړي امريکايي چارواکي چې نوم یې نه دی ښوول شوی، خبريالانو ته د ټېليفون له لارې ويلي چې تر امريکايي بندیز لاندې بانکونو کې يې يو د روسیو ځواکونو "پرومسياز بانک" دی او دویم يې د روسي ملت پرمختيايي "وي اي بي بانک" دی چې د کرېملېن تر کنټرول لاندې دی.
دغه چارواکي زياته کړې، که روسيه خپل بريدونه پرمخ وړي، نو واشنګټن چمتو دی چې د زبېر بانک او وي ټي بي په ګډون د روسيې تر ټولو لويو مالي ادارو پرضد اقدام وکړي.
