امريکا د پاکستان له لوري په جرمني کې د افغانستان په اړه کېدونکې بون کانفرنس څخه د بائيکاټ پر فيصله افسو س څرګند کړی دی . د امريکا د بهرنیو چارو وزيرې هيلري کلنټن ويلي له شريکو ګټو څخه مخ اړول د هيچا په ګټه نه دي.
د فرانس خبري اژانس په وينا هيلري کلټن په جنوبي کوريا کې د يوه کانفرنس پر وخت وويل چې هيله منه ده کېدای شي داسي لاره وي چې د يو باثباته او پياوړي افغانستان په اړه په نړيوالو هڅو کې پاکستان څه ګټه ورسوي.
امريکا له پاکستانه پر خپله فيصله د بيرته غور کولو غوښتنه کړې ده. بل خوا د افغانستان ولسمشر حامد کرزي هم د پاکستان وزيراعظم يوسف رضا ګيلاني ته تيلي فون کړی او ځيني غوښتني يې دي چې پر خپله فيصله دي غور وکړي.
پوښتنه داده چې د پاکستان دا فيصله څومره منطقي ده، دا به په بون کانفرنس څه اغيز وکړي او خپله دا فیصله په سيمه کې د پاکستان ګټو ته څومري تاوان رسولی شي دا ، او نوري پوښتني د مشال تر رڼا لاندي بحث کې څيړو. په کابل کې د افغانستان د سياسي چارو کارپوه اسماعيل يون او په پيښور کې د دفاعی چارو کارپوه بريګيډيئر سعد محمد خان مو ميلمانه دي.
