جلال اباد - د افغانستان ننګرهار ولایت په شېر زادو ولسوالۍ کې د وسله والو طالبانو، ولسي وګړو او امنیتي سرتېرو تر منځ درې ورځنۍ نښته پای ته رسېدلې ده.
په دې اوږدې نښته کې له ۱۰۰ زیات کسان وژل شوي دي.
د مشال راډیو خبریال ته د سیمې خلکو ویلي، په شېرزادو کې د یوه قامي مشر او یوه طالب وسله وال تر منځ لفظي شخړه شوې وه.
د دې شخړې په نتیجه کې مشر پر طالب وسله وال ډزې کړې دي او هغه یې وژلی دی.
تر دې وروسته طالبان ورغلي، قامي مشر یې وژلی دی او د هغه کور یې محاصره کړی دی چې په نتیجه کې یې د ولسوالۍ اوسېدونکو او طالبانو تر منځ نښته پیل شوې ده.
د ولایتي چارواکو په خبره، په دې نښته کې چې د جمعې پر ورځ پای ته ورسېده، ۷۶ وسله وال طالبان او ۲۲ امنیتي سرتېري وژل شوي دي.
چارواکو د ولسي وګړو مرګ ژوبلې په اړه څه نه دي ویلي.
هلته د وسله والو طالبانو ویاند ذبیح الله مجاهد ویلي چې دوی ۸۴ امنیتي سرتېري وژلي او ۸۹ یې ژوبل کړي دي.
تر اوسه ازادو سرچینو د مرګ ژوبلې کره شمېر نه دی ښودلی.