پراګ: په داسې حال کې چې د پاکستان امنیتي ځواکونه د خیبر پښتونخوا په سوات کې د پوځي عملیاتو د بریالیتوب ادعا کوي تیره ورځ د سوات په چارباغ سیمه کې وسله والو د ځاي امن جرګې یو بل غړی عبدالرحمان هم په ډزو وویشتی اوویې واژی. دا په روانه میاشت کې په دغه سیمه کې د هدفي وژنو دویمه پیښه ده.
د سوات قامي جرګې یو مخکښ مشر ذاهد خان وايي ، په سوات کې د پوځي عملیاتو له پاي ته رسیدو تراوسه د امن جرګو تر ۱۶۰ زیات غړي او ځاي مشران وژل شوي دي.
ذاهد خان زیاته کړه چې تر اوسه د هغوي په وژلو کې د لاس درلودلونکو پر ضد نه پلټنې شوې دي او نه هم د امنیتي ادارو له خوا نیول شوي دي.
د سوات قامي جرګې ویاند احمد شاه بیا وايي چې په سوات کې د عام ولس لپاره امن دی خو هغه خلک د مرګ له ګواښ سره مخامخ دي چې د سیمې د ولس د حقونو لپاره غږ پورته کوي.
احمد شاه وویل ، د سوات قامي جرګې غړي په ځینې معاملو کې د پاکستان له پوځي چارواکو او د سوات له ضلعي انتظامیې سره متفق نه دي.
د پاکستان د بشري حقونو د کمیشن استاذی او د قانوني چارو کارپوه شیر محمد خان اډوکېټ وايي ، په دې نیژدې موده کې په سوات کې د هدفي وژنو پیښې ډیرې شوي دي او د ریاست ذمه واري ده چې په دې اړه پلټنې وکړي او پکې ښکېل خلک د قانون منګلو ته وسپاري.
د پاکستاني پوځ چارواکي د داسې بریدونو پړه پر وسله والو طالبانواو پربهر ملکي استخباراتي ادارو اړوي.
بل پلو په سوات کې ځاي خلک وايي چې تر داسې پیښو ورسته امنیتي ځواکونه د لټون عملیات پیل کړي او په ځینې سیمو کې پر ګرځېدلو هم بندیز ولګوي خو بیا هم برید کوونکي د پېښې له ځایه په تېښه کې بریالي شي.
ستاسې سېسټم د HTML5 په چلولو کې ستونزه لري.
په دې اړه د شاهین بونېري تفصیلي رپوټ دلته واورئ