د پاکستان او امريکا ترمنځ تر هغه وروسته لفظي شخړه زياته شوې چې ولسمشر ټرمپ پر اسلام اباد د مرستو د بندولو د خپلې فيصلې په دفاع کې وويل چې پاکستان د امريکا لپاره هيڅ نه کوي او دې هېواد د القاعده مشر اسامه بن لادن سره په اېبټ اباد کې په پټېدو کې مرسته کړې وه.
د دې په ځواب کې د پاکستان وزيراعظم عمران خان وويل چې هېواد يې د ترهګرۍ پرضد جګړه کې ځاني او مالي قربانيانې ورکړې دي.
هم په دې تړاو د پاکستان بهرنيو چارو وزارت د نومبر پر ۲۰مه، په اسلام اباد کې د امریکا سفارت شارژدافېر پاول جونز وربللی او هغه ته یې په ګیله کې د ولسمشر ډونالډ ټرمپ له لوري لګول شوي تورونه بې ځایه وبلل.
په دې اړه په خپاره شوي بيان کې ویل شوي، پاکستان په افغانستان کې د نړیوالې ټولنې د هڅو ملاتړ ته دوام ورکړی او د امریکا له لوري د افغانستان ستونزې سیاسي حل را-اېستلو تر اعلان وروسته واشنګټن او اسلام اباد د سیمې له نورو ځواکونو سره په ملتیا د دغه اوږدې لانجې ختمولو کوشش کوي او پر دې نازک پړاو بېځایه تورونه د دې مهمې همکارۍ لپاره زیان رسولای شي.
پوښتنه دا ده چې د واشنګټن او اسلام اباد ترمنځ دغه ناندۍ به د ترهګرۍ ضد جګړه او د افغانستان د سولې پر روانو هڅو څه اغېز وکړي او که څنګه؟
دا او نورې پوښتنې د مشال تر رڼا لاندې بحث کې په اسلام اباد کې له پخواني ډپلوماټ ایاز وزير، د پاکستان پوځ پخواني افسر برېګېډيير سعد محمد خان او د پېښور پوهنتون د تاريخ څانګې مشر ډاکټر منهاج الحسن سره څېړل شوې دي.
ستاسې سېسټم د HTML5 په چلولو کې ستونزه لري.
د پاکستان او امريکا اختلافات به ترهګرۍ ضد جګړه او افغان سولې پروسه باندې څه اغېز وکړي؟