د افغانستان د سولې بهير لپاره د امريکا بهرنيو چارو وزارت ځانګړی استازی زلمی خليزاد د پاکستان د سفر پر مهال د هغه هېواد له لوړپوړیو چارواکیو سره لېده کاته کړي دي.
اسوشیېټېډ پرېس خبري اژانس ليکي، په عين وخت کې د طالبانو د قطر دفتر څلور استازي شهاب الدين دلاور، ضياء الرحمن مدني، سهيل شاهين او سلا حنفي هم د سېشنبې پر ورځ پاکستان ته رسېدلي دي. خو يوه پاکستاني چارواکي د نوم نه ښودلو په شرط اژانس ته ويلي چې د طالبانو د استازيو د پاکستان سفر شخصي دی.
زلمي خليلزاد د نومبر په مياشت کې له دغو طالب استازيو سره د طالبانو د قطر په دفتر کې ليدلي وو خو امريکا ددې لېدنې نه تصديق او نه هم ترديد کړی دی.
بلخوا هم د سېشنبې پر ورځ د پاکستاني پوځ عامه اړيکو ادارې ای اېس پي ار مشر مېجر جنرل اصف غفور د بهرنيو هېوادونو خبريالانو ته ويلي چې پر طالبانو د پاکستان د نفوذ په خبره کې له مبالغې کار اخيستل شوی دی خو البته و یې ويل چې اسلام اباد په وار وار طالبانو ته ويلي چې د سولې په بهير کې دې ګډون وکړي.
د خليلزاد او طالبانو پر يوه وخت په پاکستان کې شتون او هم په دې ورځ د پاکستان د پوځ د وياند دا خبره چې پر طالبانو د اسلام اباد د نفوذ په خبره کې له مبالغې کار اخيستل شوی دی، دا پوښتنه راپورته کوي چې ايا پاکستان په رښتيا هم د افغانستان په سولې پروسه کې محدوده رول لوبولی شي او که نه د سياسي تکتک له مخې دا خبره کوي.؟
دا او نورې پوښتنې د مشال تر رڼا لاندې بحث کې په لندن کې مېشت خبريال سميع يوسفزي او په اسلام اباد کې د پاکستان د پوځ پخوانی افسر برېګېډيير سيد نذير سره څېړل شوې دي.
ستاسې سېسټم د HTML5 په چلولو کې ستونزه لري.
خليزاد او طالب استاذيو د پاکستان سفر او سولې بهير کې د اسلام اباد رول؟