په کابل کې د امریکا سفیر هغه رپورټونه رد کړي چې ګوندې د جنورۍ پر نهمه د امریکا او طالبانو ترمنځ خبرې په پلان کې وې.
جان باس په دې اړه ډېر معلومات نه دي ورکړي خو د جنورۍ اتمې پر ماښام پر ټوېټر لیکلي:
"د امریکا او طالبانو ترمنځ د چهارشنبې پر ورځ د خبرو رپورټونه ناسم دي. طالبان چې څومره له رسنیو سره خبرې کوي، هومره باید له خپلو افغان هېوادوالو سره هم وغږېږي."
Reports of US-Taliban talks Wednesday inaccurate. Taliban should talk to fellow Afghans as much as they talk to media.
— John R. Bass (@USAmbKabul) January 8, 2019
جان باس دا څرګندونې تر هغې وروسته کړې دي چې د جنورۍ پر اتمه طالبانو یو شمېر رسنیو ته وویل، د اجنډې پر سر د اختلاف له کبله د چهارشنبې پر ورځ د طالبانو او امریکا ترمنځ د قطر خبرې لغوه کوي.
رویټرز خبري اژانس د یو شمېر طالب چارواکو له قوله چې نومونه یې نه دي یاد شوي ویلي، په اجنډا کې لوی اختلافونه، په خبرو کې د افغان حکومت د شمولیت، د بندیانو پر خوشې کولو او په ۲۰۱۹ز کال کې د اوربند د اعلان پر مسلو وو.