دیر - د خیبر پښتونخوا د بر دیر په شیرینګل کې د سړک تر غاړې ښخ بم په چاودنه کې لږ تر لږه څلور کسان وژل شوي او ۲۲ ژوبل دي.
د سیمې د پولیسو مشر میا نصیب جان د اګست ۱۸مې پر ماښام مشال راډیو ته وویل، پېښه مازیګر مهال د شیرینګل په حیاګي کې شوې چې پکې د یوه ځايي مشر ملک معتبر خان کاروان په نښه شو خو هغه له بریده روغ وتلی دی.
نوموړی د طالبانو ضد د امن لښکر مشر هم پاتې شوی وو.
تحریک طالبان پاکستان د حملې ذمه واري منلې.
خو پولیس وايي، ملک معتبر خان او ملګري یې شخصي دښمنۍ هم لري نو ځکه یې د رېموټ کنټرول بمي چاودنې "هراړخیزه پلټنو" امر کړی دی.
د پولیسو مشر په وینا، په ژوبلو کې د دوو روغتیايي حالت خراب دی.
صوبايي حکومت د پېښې نوټس اخیستی.
د خیبر پښتونخوا په دیر، سوات، پېښور او قبایلو په ګډون په یو شمېر سیمو کې اکثر د امن لښکرو مشران او غړي په وسله والو بریدونو کې په نښه شوي.
د ۲۰۱۹ز کال د اپرېل پر ۳۰مه په مومندو کې په بمي برید کې د امن لښکر یو پخوانی غړی وژل شوی وو.