د نوښار ضلعې په کاکا صیب زیارت کلي کې د دوشنبې/ګل پر ورځ یوه اووه کلنه ماشومه عوض نور مړه موندل شوې ده.
د پولیسو یوه ځايي چارواکي افسر علي په دوشنبه ناوخته مشال راډیو ته وویل، د ماشومې کورنۍ لخوا له رپورټه پس چې یې هغوی لټون پیل کړو نو د هغې جسد یې د اوبو په یوه ټانکۍ کې وموندلو.
نوموړي وویل، د ماشومې قاتل یې نیولی او لومړنۍ پلټنې ښيي چې جنسي تېری نه دی ورسره شوی.
دا هم وګورئ: د فرشتې د وژنې په تور نيولي تن خپل جرم ومانه: پولیسدی زیاتوي چې ټېسټونه یې یوې بلې لیبارټرۍ ته استولي دي چې له هغې څخه نورې نتیجې هم ترلاسه کړي.
د عوض نور یوه ماما مشال راډیو ته وویل، تورن تن د هغوی په ورکړل شوي کور کې د همسایه په توګه اوسېده.
په خیبر پښتونخوا کې د ماشومانو حقونو لپاره کارکونکې ادارې ګروپ ډیولیپمېنټ پاکستان غړی عمران ټکر وايي په ۲۰۱۸ کال کې په پاکستان کې تر څلورو زرو زیات ماشومان د جنسي تېري ښکار شوي دي.