د پاکستان وزیراعظم عمران خان د اګست پر ۱۳مه په پېښور کې د چټک بس پروژې (بس ریپېډ ټرانزېټ یا بي ار ټي) سروېس (خدمات) پرانیست.
دا پروژه په خیبر پښتونخوا کې د پاکستان تحریک انصاف ګوند تېر حکومت په ۲۰۱۷ز کال کې پیل کړې وه.
د پروژې بشپړېدو لپاره اول شپږ میاشتې وخت ورکړل شوی وو خو وخت په وخت د تخنيکي او تعميراتي نیمګړتیاو له کبله ځنډېده چې اوس شاوخوا درې کاله وروسته پرانیستل شوه.
د بس دا ځانګړې لار د پېښور له څمکنیو څلورلارې څخه پیلېږي او د حیات اباد په صنعتي زون کې پای ته رسي او تر ۳۰ زیات تمځایونه لري.
د چټک بس د دې پروژې سړک شاوخوا ۲۷ کیلیومیټره اوږد دی.
د خیبر پښتونخوا اعلا وزیر محمود خان د اګست پر ۱۲مه خبریالانو ته وویل، د پروژې له پرانیستو سره به ولس له معیاري ټرانسپورټي اسانتیاوو برخمن شي.
له حکومتي اسنادو سره سم، په پیل کې د پروژې چارو لپاره شاوخوا ۵۰ اربه روپۍ ايښوول شوې وې خو اوس یې لګښت تر ۷۰ اربه روپیو لوړ شوی دی.
د چټک بس سړک شاوخوا ۲۷ کیلومیټره اوږد دی او تر ۳۰ زیات تمځي لري
په ټاکلې موده کې د نه بشپړېدو او په تعمیراتي چارو کې د نیمګړتیاوو له وجې صوبايي حکومت د پروژې لګښت څو ځلې لوړ کړ.
په ۲۰۱۸ز کال کې ورته ۴۹ اربه روپۍ ځانګړې شوې وې، په ۲۰۱۹ز کال کې د پروژې بجټ څه باندې ۶۶ اربو روپیو ته ورسېد او اوس حکومت وايي د باندې څلور اربو روپیو له اضافې سره یې لګښت ۷۰.۷ اربه روپیو ته رسېدلی دی.
د پروژې د ټرافیکي چارو یو افسر عالمګیر بنګښ وايي، خلک د موبایل اپليکېشن له لارې ټېکېټ اخیستای شي او کارډ جوړولای شي.
د ده په خبره، اوسمهال شاوخوا ۲۰۰ بسونه لري چې ټوله ورځ به د بي ار ټي پر سړکونو تګ راتګ کوي.
دا هم وګورئ: د بي ار ټي په بسونو کې د سفر طریقهد پروژې د چارو او ځنډ له وجې واکمن تحریک انصاف د اپوزیشن، د پېښور اوسېدونکو، ټرانسپورټرانو او د ښار کاروباریانو له انتقاد سره مخامخ شو.
پر حکومت همداراز په پروژه کې د درغلۍ تورونه هم پورې شول چې واکمن تحریک انصاف رد کړي.
د اسیا پرمختیايي بانک د بي ار ټي سړک او تمځایونو جوړولو لپاره د خیبر پښتونخوا حکومت ته د ۵۹۳ میلیونه امریکايي ډالرو پور ورکړی او پاتې پانګه ورته صوبايي حکومت برابره کړې.
په پاکستان کې د ۲۰۱۷ز کال له سرشمېرنې سره سم، د پېښور ابادي تر څلور میلیونه لوړه ده چې له وجې یې ښار نه یوازې ټرافیکي ستونزې لري بلکې هوا یې هم د زیاتو ګاډو له وجې ککړه ده.
حکومت وايي، د چټک بس پروژې له لارې به په ښار کې د ټرافیک او چاپېریال ککړتیا ستونزې تر یوه بریده هوارې شي.