افغان چارواکي وايي چې په کابل کې د استوګني پر ځايونو د اګست پر ۱۸مه ۱۴ توغندي توغول شوي دي.
دا په داسې حال کې ده چې افغانستان (د اګست پر ۱۸مه) د خپلواکۍ ۱۰۱ مه کلیزه نمانځي.
د دې هېواد کورنیو چارو وزارت ویلي چې د کابل شمال او ختیځ لورې څخه له دوو موټرو راکټونه توغول شوي دي.
د وزارت وياند طارق ارين په خپله فېسبوک پاڼه ليکلي چې د استوګني پر ځايونو توغول شويو راکټونو کې ۱۰ کسان ټپيان شوي چې پکې څلور ماشومان او يوه ښځه ده. نوموړي ويلي چې د بريدونو په تړاو دوه مشکوکه کسان نيول شوي خو د هغوي د پېژندګلوي په اړه يې مالومات نه دې ورکړي.
د کابل شمال او ختیځ لورې څخه له دوو موټرو راکټونه توغول شوي دي.کورنيو چارو وزارت
بلخوا رویټرز اژانس وايي چې چاودونو د کابل ښار سفارتي سیمه ولړځوله. اژانس د سرچينو له قوله ليکلي چې د سفارتخانو کارکوونکیو ځانونه ډ ډې ته کړي اوسیمه تړل شوې ده.
د ارګ يوې سرچینې له قوله ويلي شوي چې يو توغندی د ارګ له تشريفاتي قطعې سره نږدې پرېوتی.
رپوټونه وايي، راکټونه له هغې لږ وخت وروسته وتوغول شول چې افغان ولسمشر اشرف غني په دفاع وزارت کې د خپلواکۍ مینار ته د ګلونو ګېډۍ کېښودله.
د ۱۹۱۹ز کال اګست پر ۱۸مه د افغان او برتانوي ځواکونو ترمنځ جګړې شوې وه چې په نتیجه کې یې افغانستان په بشپړه توګه خپلواکي ترلاسه کړه. تر دې له مخه د دې هېواد بهرنۍ تګلاره د برتانیا په کنټرول کې وه.
تر اوسه د پېښې ذمه واري چا نه ده منلې او د وسله والو طالبانو ویاند ذبیح الله مجاهد ویلي چې له دې بريده خبر دی.
خو په افغانستان کې فعاله د اسلامي دولت وسله والې ډلې سره تړلي وسله والو په تېرو وختونو کې د دې هېواد ملي مراسم په نښه کړي دي.