په پاکستان جمهوري تحریک کې شامل ګوندونو د حکومت لخوا د کورونا وايرس د صورتحال په لړ کې د جلسو د ځنډولو خبره رد کړې ده او دوی ویل دي چې له ټاکل شوي پروګرام سره سم به د نومبر پر ۲۲مه په پېښور کې خپله جلسه ترسره کوي.
په دغه اړه د نومبر پر ۱۷مه په پېښور پرېس کلب کې په جمهوري اتحاد کې د شامل ګوند عوامي نېشنل ګوند د پښتونخوا ویاندې ثمر هارون بلور د خبري کانفرس وروسته له مشال راډيو سره په مرکه کې وویل چې د جلسې لپاره یې تیاریانې روانې دي او که په پېښور کې د هغوی د جلسې کولو مخه ونیول شوه نو ټول ګوندونه به د اسلام اباد په لور لاریون کوي.
نوموړې وايي: "هر یو سیاسي ګوند د یونین کونسلو په کچه د راروانې جلسې لپاره تیارې نیولی دی، د کورونا وایرس احتیاطي تدبیرونو ته پام لرنه سره به موږ په جلسه کې ګډون کوو، اوس حکومت کله وايي د ترهګر بریدونو خطر دی او کله وايي د کورونا وبا زیاته شوه، دوی چې کله جلسې جلوسونه کوي نو نه کورونا وایرس وي او د چاودنو خطر، نو ایا دا هر خطر یوازې د جمهوري غورځنګ یا د حزب اختلاف لپاره دي، موږ به خپله جلسه ضرور کوو، کچیرې دلته یې زموږ لاره ونیوله نو موږ به اسلام اباد ته لاریون کوو او هغلته به بیا جلسه کوو."
دا هم وګورئ: پاکستان جمهوري تحریک په کوټه کې جلسه کړېد نومبر پر ۱۶مه په اسلام اباد کې د کورونا وایرس د مخنیوي لپاره د قومي همکارۍ کمېټۍ د غونډې وروسته وزیر اعظم عمران خان ویلي وو چې په هېواد کې د کورونا وایرس د دوهمې څپې په ترڅ کې ورځ تربلې د کورونا وایرس د مثبتو پېښو په شمېره کې زیاتوالې کېږي او د یادې ناروغۍڅخه د مړو شمېره هم مخ په زیاتېدو ده، او په دې وجه دوی د جلسو جلوسونو د ځنډولو فیصله کړې ده.
د وزیر اعظم عمران خان لخوا په لویو غونډو او لاریونو د بندېز د خبرې وروسته د خېبر پښتونخوا د اطلاعاتو صوبايي وزیر کامران بنګش هم په پېښور کې په خبري کانفرنس کې ویلي دي چې په صوبه او مرکز کې حکمران ګوند پاکستان تحریک انصاف د نومبر پر ۲۱مه په رشکۍ کې د اقتصادي زون د پرانستې لپاره رابلل شوي جلسه هم ځنډولې ده او د کورونا وایرس د صورتحال په وجه دي حزاختلاف هم خپلې سیاسي هلي ځلې وځنډوي.
دا هم وګورئ: د عمران خان حکومت جعلي دی: اپوزیشن ګوندونهنوموړي وايي: "د صنعتی زون او د چینایي ستیل میل د پرانیستې په لړ کې مو په رشکۍ کې ډېره لویه جلسه رابللې وه، خو ولس د روغتیا ته د خطر په خاطر مو دغه جلسه وځنډوله، موږ له نورو سیاسي ګوندونو هم اپیل کوو چې هغوی دې هم خپلې سیاسي غونډې منسوخ کړي."
خو د حزب اختلاف ګوندونه وايي، په پېښور کې د نومبر پر ۲۲مه نېټه د پي ډي اېم د جلسې پرمهال به د کورونا وایرس په احتیاطي لارښوونو عمل یقیني کوي او جلسې ته راتلونکي خلکو لپاره یې د ماسکونو او سېنیټایزر د ورکولو انتظامات هم برابر کړي دي.