د امریکا د بهرنیو چارو وزیر وايي، له افغان ولسمشر اشرف غني سره يې د دواړو هېوادونو تر منځ د پايداره مشارکت د ژمنتيا په اړه خبرې کړې دي.
اېنټوني بلينکېن پرون ماښام د جنورۍ پر ۲۸مه پر ټویټر ولیکل چې نوموړي په دې ټېليفوني خبرو کې د امریکا دا هيله تکرار کړه چې ټول افغان رهبران به د ۲۰ کلونو پرمختګونو په ساتلو سره دې تاريخي فرصت ملاتړ وکړي.
Spoke with Afghan President @ashrafghani about our commitment to an enduring U.S.-Afghan partnership. I reiterated the U.S. desire for all Afghan leaders to support this historic opportunity for peace while preserving the progress made over the last 20 years.
— Secretary Antony Blinken (@SecBlinken) January 28, 2021
د امریکا د بهرنیو چارو وزارت ویاند نېډ پرایس په یوه بیان کې ویلي چې بلينکېن د افغان سولې بهیر، هراړخیز او عادلانه سیاسي توافق او د يو داسې دایمي اوربند د ملاتړ ټينګار کړی چې د ټولو افغانانو ګټې پکې خوندي وي.
بلينکېن ویلي چې امريکا به له افغان طالبانو سره شوې د سولې تړون ته بیا کتنه کوي چې و پوهېږي ایا طالبان له ترهګرو ډلو سره د اړیکو پرې کولو، تاوتریخوالي کمولو او د افغانستان له دولت او نورو ښکېلو اړخونو سره د بامفهمومه خبرو ژمنې عملي کوي او که نه.
دا هم وګورئ: سېند حکومت د ډېنييل پرل کېس ته د بيا کتنې خواست کړید غني او بلينکېن ترمنځ دا ټېليفوني خبرې له هغه وروسته شوي چې پرون د شېر محمد عباس ستانکزي په مشرۍ د طالبانو یوه پلاوي په مسکو کې د افغانستان لپاره د روسیې له ځانګړي استازي ضمیر کابولوف سره وکتل.
په قطر کې د طالبانو د سیاسي دفتر ویاند محمد نعیم وردک مشال راډیو ته وویل چې په دې کتنه کې د سولې د بین الافغاني خبرو پر روان وضعیت او د دوحې د تړون پر پوره تطبیق خبرې وشوې.
له دې وړاندې بيا په قطر کې د طالبانو د سیاسي دفتر د مشر ملا عبدالغني برادر په مشرۍ د دې ډلې یو بل پلاوي د جنورۍ پر ۲۷مه د ایران د ملي امنیت د عالي شورا له منشي علي شمخاني او نورو چارواکو سره په تهران کې ولیدل.