د امریکا دفاع وزیر لویډ اسټن له افغانستان سره د مشارکت او غښتلو دفاعي اړیکو ډاډ ورکړی دی.
اسټن دا خبره د فېبرورۍ پر پنځمه له افغان ولسمشر اشرف غني سره تر ټیلېفوني خبرو وروسته په خپل ټوېټر لیکلې ده.
هغه ویلي له افغان ولسمشر سره يې د افغان سولې پروسې د چټک پرمختګ د اهمیت او د افغانستان او امریکا په ګډ قوي مشارکت خبرې کړې دي.
I had a great call today with President @AshrafGhani this morning. We discussed our mutual commitment to a strong U.S.-Afghan partnership and the importance of making urgent progress on the Afghan peace process. Looking forward to a productive partnership. pic.twitter.com/K3GtIq6b0J
— Secretary of Defense Lloyd J. Austin III (@SecDef) February 5, 2021
د افغانستان جمهوري ریاست هم په یوه اعلامیه کې د دې خبرو یادونه کړې.
د ارګ اعلامیه زیاتوي چې افغان ولسمشر او د امریکا دفاع وزیر په افغانستان کې د تاوتریخوالي په زياتوالي اندېښنه وښوده.
دا په داسې حال کې ده چې د افغانستان ملي مصالحې عالي شورا پر طالبانو تور لګولی چې په بې دلیله پلمو د سولې په خبرو کې د ځنډ باعث کېږي.
د سولې عالي شورا د فېبرورۍ پر پنځمه په یوه خبرپاڼه کې د دې شورا د مشر عبدالله عبدالله له قوله ویلي چې طالبان د جګړې پای ته رسولو په اړه د اصلي خبرو پرځای په سفرونو او نورو بحثونو بوخت دي، خو وسله وال یې په افغانستان کې د خلکو پرضد تشدد ته دوام ورکوي.