افغان چارواکيوايي د هغو بهرنيوو داعش غړو په اړه یې د هغوی هېوادونو سره خبرې پېل کړي چې په افغانستان کې بندیان دي.
د افغانستان استخباراتي ادارې، اين ډي ایس مشر احمد ضيا سراج د اپرېل په ۲۷مه په کابل کې په يوه خبري غونډه کې وويل چې دوی سره دا مهال ۴۰۸ بهرني داعش وسله وال بنديان دي. د نوموړي په خبره په دوی کې د پاکستان ۲۹۹ وګړي شامل دي.
هغه زیاته کړه: ((د چين، هند، روس او ازبکستان په شمول د ۱۴ هېوادونو وګړي موږ سره بندیان دي. دا ټول د داعش غړي دي چې موږ په بېلابېلو وختونو کې نيولي دي. د بندیانو سره د دوی ۱۷۳ماشومان هم دي. موږ غواړو د دوی هېوادونو سره خبرې وکړو چې په اړه یې یو حل لاره پېدا شي.))
"ما در یک جنگ قرار داریم که به نیابت از منطقه و جهان میجنگیم!"#NDS_Afghanistan pic.twitter.com/Doj1Le43ni
— NDS Afghanistan (@NDSAfghanistan) April 27, 2021
سراج دا ونه ويل چې د دغو هېوادونو سره د دې بندیانو د سپارلو په اړه خبرې کول غواړي او که څنګه؟ خو هغه زیاته کړه چې له دې ثابتیږي چې افغان ځواکونو نه يوازې د افغانستان بلکې د نړۍ د خوندېتوب لپاره کار کوي.
داعش وسله واله ډله په عراق او شام کې په ۲۰۱۴ کال کې منځته راغلې وه خو په ۲۰۱۵ کال کې یې د داعش خراسان دلاندې په افغانستان او پاکستان کې هم فعالیت پېل او حافظ سعيد یې مشر اعلان کړ.
د قبایلي ضلعو قومي مشران د ننګرهار ولايت د چارواکو سره د داعش د نيول شوو غړو په اړه په جرګه بوخت دي
دې ډلې په ۲۰۱۸ او ۲۰۱۹ کلونو کې په ننګرهار ولايت کې ډېر قوت پېدا کړ او د هغه ځای په شمول یې په کابل کې هم لوی بریدونه وکړل. د دوی مرکزونه په اچين ولسوالۍ کې وو. خو د افغان ځواکونو په لاس د داعش وسله والې ډلې د مشرانو پرله پسې وژل کېدو، د مرکزونو له منځه تللو او د وسله والو د تسلیمېدو له امله یې زور مات شو.
د پاکستاني بندیانو او کورنيوو د سپارلو لپاره یې د قبايلي ضلعو د قومي مشرانو او ننګرهار د چارواکو ترمنځ جرګې هم شوې وي. د ۲۰۲۰ کال په جنورۍ کې هغه مهال د ننګرهار ولايت والي، شاه محمود مياخېل مشال رېډيو ته ويلي وو چې سل بنديکورنۍ یې قومي مشرانو ته سپارلي دي.
د پاکستان او افغانستان ترمنځ د بندیانو د تبادلې تړون نشته. تر اوسه د پاکستان حکومت د خپلو وګړو د سپارنې يا هم د بندیانو د تبادلې په اړه څه نه دې ويلي.