د جانيخېلو مشرانو د وعدو نه پوره کېدو په صورت کې د بيا احتجاج ګواښ وکړ

د شمالي وزيرستان جانيخېلو جرګې ګواښ کړی چې که حکومت ورسره پر تړون عمل ونکړي نو دوی به د اسلام اباد پر لور لاريون کوي.

حکومت او د جانيخېلو مشرانو د مارچ په مياشت کې له هغه وروسته تړون کړی وو چې کله د سيمې خلکو د څلورو ځوانانو د وژنې پرضد تر اتو ورځو احتجاجي پرلت کړی وو. د دې ځوانانو مړي تر شل ورځې لادرکه کېدو وروسته موندل شوي وو او تر اوسه یې معلومات نه دی شوی چې چا او ولې وژلي دي.

د جانيخېلو د مشرانو سره په حکومتي تړون کې چارواکو ژمنې کړې وې چې په درې مياشتو کې به د وژل شويو کسانو قاتلان نيول کېږي او سزا به ورکوي، له کورنيو سره به يې مالي مرستې کوي، سيمه به له وسله والو پاکوي او د جانيخېلو د لادرکه کسانو ستونزه به هواروي.

خو د مې په ۲۲مه په بنو کې تر جرګې وروسته يو مشر ډاکټر ګل عالم وزير خلکو ته په وينا کې وويل داسې ښکاري چې له حکومت سره اوس هم د ژمنو پوره کولو وخت شته او اهميت نه ورکوي. نوموړي زیاته کړه چې که حکومت همدا رويه روانه وساتله نو دوی به د پاکستان تر مرکزه، اسلام اباد د مظاهرې په شکل ورشي او احتجاجي پرلت به ووهي.

مشال رېډیو هڅه وکړه چې له چارواکو سره په دې اړه خبرې وکړي خو څوک په ښکاره خبرو ته حاضر نشو البته د شمالي وزيرستان يو چارواکي د نوم نه ښوولو په شرط وويل چې دوی وار له مخه په تړون عمل پیل کړی دی.دغه چارواکي دا هم وويل چې تر اختر لږ مخکې ډپټي کمشنر د حکومتي ژمنو د عملي کولو په لړ کې د قومي مشرانو سره جرګه هم کړې وه.

دوی په دې عمل کې د هغې پولیس تاڼې ذکر هم کوي چې د جانيخېلو سره تر تړون وروسته جوړه شوې خو د دې تاڼې پرانیستې ته ځايي‌مشران ځکه د احتجاج په توګه نه وو ورغلي چې د دوی‌په وينا حکومت هسې نمایشي کارونه کوي او اصلي وعدې یې نه دې پوره کړې.

د جانیخېل مشران وايي، حکومت منلې چې په سیمه کې به یې امن پر ځای کوي