د شمالي وزیرستان د همزوني سیمې خلکو د مې پر ۲۹مه، د میرامشاه پریس کلب مخې ته مظاهره وکړه.
دوی له حکومته غوښتنه کوله چې د هغوی د قبیلې درې نیول شوي کسان دې خوشې کړي. د مظاهره کوونکیو په وینا، دا درې کسان د مې پر ۲۰مه نېټه امنیتي ځواکونو نیولي. تر هغې یوه ورځ وړاندې په همزوني سیمه کې د سړک غاړې په بمي چاودنه کې یو سرتېری ژوبل شوی و.
د همزوني خلکو د شک په بنیاد د خپلو درې همخېلو د نیول کېدو نه پس د مې له ۲۰مې نېټې راهېسې پرلت هم غځولی او مظاهرې یې هم کړې دي.
د مې پر ۲۹مه همزوني قبایلو د میرامشاه پریس کلب مخې ته د مظاهرې پر مهال وویل، که د هغوی د قبیلې خلک څه ګناه لري نو پولیسو ته دې وسپارل شي او که بې ګناه وي نو خوشې دې کړل شي.
د دغو مظاهره کوونکیو په وینا، دا چې په همزوني کې د هغوی پرلت ته حکومت توجه ونه کړه نو هغوی اړ شول چې د میرامشاه پریس کلب مخې ته مظاهره وکړي. هغوی دړکه وکړه چې که خبره یې وانه ورېدل شوه نو بله مظاهره به یې په پېښور کې وي.
د پرلت یو مشر ملک جان محمد د میرامشاه پریس کلب په وړاندې خبریالانو ته وویل، اول د هغوی د قبیلې شپږ کسان امنیتي ځواکونو نیولي وو چې وروسته یې درې تنان خوشې کړل خو درې نور لا هم د امنیتي ځواکونو په ولقه کې دي. د نوموړي په وینا د خپلو کسانو د خوشې کولو لپاره یې د حکومتي چارواکو سره جرګې هم کړې دي خو څه نتیجه یې نه ده ورکړې.
بل پلو، د شمالي وزیرستان ډېپټي کمېشنر شاهد علي خان د مې پر ۲۹مه مشال راډیو ته وویل، هغوی د همزوني قبیلې د مشرانو سره په تماس کې دي او دا مسله به زر هواره شي.
خو یو امنیتي مامور د نوم د پټ ساتلو په شرط د مې پر ۲۹مه نېټه مشال راډیو ته وویل، درې بې ګناه نیول شوي کسان یې خوشې کړي خو پاتې درو نورو په خپل جرم اعتراف کړی دی نو ځکه یې نه پرېږدي.