د افغانستان د حکومت د اطلاعاتو او رسنیو د مرکز مشر دواخان مینه پال په کابل کې ووژل شو.
د افغانستان د کورنیو چارو وزارت د مینه پال وژل تایید کړي او پخواني ویاند یې طارق ارین په خپله فیسبوک پاڼه کې دواخان مینه پال د طالبانو او پاکستان ضد څېره او مړینه یې لوی غم بللی دی.
د راپورونو له مخې مینه پال نږدې دوه بجې د کابل په دارالامان سړک د روسیې سفارت ته نږدې د نا معلومه وسله والو په برید کې وژل شوی دی.
مینه پال له دې وړاندې د جمهوري ریاست د ویاند مرستیال و.هغه څو کاله له ازادي راډیو سره د خبریال په توګه هم کارکړی و.
طالبانو د ښاغلي مینه پال د وژلو مسولیت واخیست.
د دې ډلې یوه ویاند ذبیح الله مجاهد شیبه مخکې وویل چې د کابل د ادارې د اطلاعاتو او رسنيو د مرکز مشر دواخان مینه پال د کابل په دارالامان سیمه کې د مجاهدینو په یوه ځانګړي برید کې ووژل.
طالبانو د چمن-بولدک لار وتړله
بلخوا د افغانستان او پاکستان ترمینځ د چمن لاره د اګست پر شپږمه یو وارې بیا د تګ راتګ او تجارت لپاره وتړل شوه.
د بلوچستان چارواکو نن وویل، لاره په سپین بولدک کې طالبانو تړلې ده. طالبانو د جولای پر ۱۴مه نېټه د کندهار سپین بولدک ولسوالي نیولې وه او له هغې وروسته په چمن کې د «دوستۍ دروازه» څو وارې تړل شوې او پرانېستل شوې ده.
په چمن کي د ځايي چارواکو په وینا طالبان وايي چې ترڅو پاکستان په هغه ملک کې میشت اسناد لرونکو افغان کډوالو ته د ورتلو اجازه نه وي ورکړې نو د چمن-بولدک لار به تړلې وي.
دا بیان د اګست پر ۵ مه نېټه د کندهار لپاره د طالبانو نومول شوي والي مولوي حاجي وفا په یوه جاري کړي خبرپاڼه کې کړی.
د بلوچستان د سوداګرو د اتحادیې مرستیال بدارالدین کاکړ نن مشال راډیو ته وویل، د لارې بندېدل د هغوی ستونزې زیاتوي.
"د لارو بندېدل د دواړو خواوو تجاران زیانمنوي ځکه چې دواړو خواوو ته بار شوې لارۍ ولاړې پاتې دي او مالونه خرابېږي."
تازه راپورونه وايي، د لارې د بندېدو له وجې دواړو غاړو ته سلګونه کسان بند پاتې شوې او لوی بیروبار جوړ دی.