امريکايي چارواکي وايي، په قطر کې یې له طالبانو سره د امريکا د ملي ګټو په اړونده مسايلو خبرې کړې دي.
د امريکا بهرنيو چارو وزارت د ډسېمبر پر لومړۍ نېټه په يوه خبرپاڼه کې وويل چې د افغانستان لپاره د امريکا ځانګړې استازي، ټام ويسټ د نومبر پر ۲۹مه او ۳۰مه په دوحه کې د طالبانو له لوړپوړو چارواکو سره په خبرو کې د طالبانو د دې ژمنتيا پر اهميت ټينګار وکړ چې وايي، اجازه به ورنه کړي چې د افغانستان خاوره د نورو پرضد د ګواښ لپاره وکارېږي.
A delegation of @StateDept, @USAID, and @USTreasury held meetings with the Taliban where they discussed U.S. interests in Afghanistan. This engagement is a continuation of pragmatic diplomacy on Afghanistan in coordination with Allies and partners. https://t.co/PktOynLmRu
— Ned Price (@StateDeptSpox) November 30, 2021
د طالبانو د پلاوي مشري د دوی د بهرنيو چارو وزیر امیر خان متقي کوله. د خبرپاڼې ترمخه طالبانو يوځل بيا ژمنتيا وښوده چې افغان خاوره به د هېچا پرضد نه کارېږي خو اعلاميه زیاتوي چې طالبانو ته واضحه کړل شوه چې امريکا په افغانستان کې د داعش او القاعدې په مسلسل موجوديت اندېښمنه ده.
همداراز زياته شوې چې له طالبانو سره هغو افغانانو ته د خوندي لارې ورکولو په اړه هم خبرې وشوې چې غواړي له افغانستانه ووځي.
په دې بيان کې ويل شوي چې پر دې وعده د طالبانو د عمل کولو هرکلی کوي خو زیاتوي چې پر طالبانو ټينګار وشو چې د ښځو او اقلیتونو په شمول د ټولو افغانانو حقونه خوندي کړي.
د امريکا بهرنيو چارو وزارت زیاته کړې چې د ملګرو ملتونو او نورو نړيوالو ادارو سره کار کوي چې په افغانستان کې بشري مرستې دوام ومومي.
طالبان د اګست پر ۱۵مه کابل ته ننوتل او د افغان حکومت چارې يې په خپلو لاسونو کې واخیستې. تر هغې وروسته یې دا د امريکايانو سره د لوړې کچې لومړي مذاکرات دي.