د خيبر پښتونخوا په بېلابېلو ښارونو کې د خوست او کونړ حملو پر ضد مظاهرې وشوې

په شمالي وزیرستان، بنو، ډېره اسماعيل خان، خیبر او کراچۍ کې بېلابېلو سیاسي ګوندونو او مدني فعالانو د مظاهرو په کولو سره د خوست او کونړ بمبارۍ وغندلې.

د خوست د سپېرۍ او کونړ د شلتن ولسوالۍ خلکو مشال راډيو ته ويلي چې اپريل په ۱۶مه د پاکستان جيټ الوتکو د دوی پر ځينو کليو بمبارۍ کړې دي. په کونړ کې د ۵ او په خوست کې د ۴۷ کسانو د وژل کېدو راپورونه راغلي. په خوست، ننګرهار، کندهار، کابل او بلخ کې خلکو د دې حملو پر ضد مظاهرې کړې دي.

​پر خوست شوې حملو کې وژل شوي اکثره هغه وزيرستاني کډوال دي چې په ۲۰۱۴ کال کې له ضرب عضب عملياتو څخه د ځان خوندي ساتلو لپاره نيزدې خوست ته کډه شوې وو.

دا هم وګورئ: خوست او کونړ کې 'پاکستانيو الوتکو' بمباري کړې، طالبانو پاکستانی سفیر احضار کړی

د شمالي وزیرستان په سپين وام کې د پښتون ژغورغنې غورځنګ مشر، ډاکټر محمد حیات مشال راډيو ته وويل چې د اپريل په ۱۷مه د دوی مظاهره د دې لپاره وه چې د وژل شوو کډوالو لپاره انصاف وغواړي. ((پر وزیرستاني کډوالو بمبار کې ماشومان او ښځې وژل شوي دي. موږ د پېښې پلټنې او د خلکو لپاره انصاف غواړو.))

پښتون ژغورنې غورځنګ په ډيره اسماعيل خان، بنو، کراچۍ، لواړګي او پېښور کې هم مظاهرې کړې دي. د پېښور مظاهرې ته د دې غورځنګ مشر، منظور پښتين وويل چې په يوه او بل نامه د پښتنو وژنې بايد ودریږي. هغه زیاته کړه چې د ولسي وګړو او په تېره بيا د ښځو او ماشومانو وژل په جنګي جرمونو کې راځي.

د شمالي وزيرستان د ميرعلي په عېدک سيمه کې د جمعيت علمای اسلام (ف) په مشرۍ مظاهره کې هم غوښتنه وشوه چې د پاکستان حکومت دې د دې بریدونو پلټنه وکړي. مظاهره چيانو زیاته کړه چې کډوال بايد نور وځورول شي.

د بنو په مظاهره کې هغو کډوالو برخه اخیستې وه چې د خوست او پکتيکا څخه تازه راستانه شوي خو لا هم خپلو کليو ته نه دې تللي. د لاریون یو مهتمم او د پښتون ژغورنې غورځنګ یو مشر زاکیم وزیر مشال ریډیو ته وویل، چې یو خوا له کلونو څخه په کډوالۍ کې دي بل خوا په بماري کی وژل کیږي.

هغه وويل: "دردناکه پېښې شوې. موږ لا تر اوسه په کمپونو کې ژوند کوو. موږ دې خپلو سیمو کې مېشت کړي او د دې بریدونو پلټنې دې وشي. موږ ارام ژوند غواړو. که دوی څوک وسله وال په نښه کړی وي نو ودې ښيي چې کوم وسله وال یې وژلی؟"

عیني شاهدان په خوست کې د برید په اړه څه وايي؟

د پاکستان په قامي اسمبلۍ کې د شمالي وزیرستان غړي او د ملي جمهوري تحريک (اېن ډي اېم) مشر محسن داوړ د دې حملو د پلټنو غوښتنه کړې ده. هغه په قامي اسمبلۍ کې د تقریر پر مهال دا بریدونه وغندل او د پاکستان له نوي وزيراعظم شهباز شريف څخه يې وغوښتل چې د ریاست د ښو او بدو طالبانو پالیسي ختمولو لپاره کار وکړي.

د پاکستان بهرنيو چارو وزارت د اپريل په ۱۷مه په يوه خبرپاڼه کې وويل چې د دوه اړخيزو امنيتي مسايلو په اړه په افغانستان کې د طالبانو له حکومت سره شريک کار کول غواړي. دې وزارت په خوست او کونړ کې د پاکستاني الوتکو د بمباريو په اړه څه ذکر نه دی کړی خو زیاته کړې یې ده چې د افغانستان د "خپلواکۍ او خودمختارۍ احترام" کوي.

په بيان کې ادعا شوې چې تحريک طالبان پاکستان له افغانستانه پر پاکستاني سرتيرو بریدونه کوي. بلخوا د طالبانو د بهرنيو چارو وزارت د اپرېل پر ۱۶مه په کابل کې د پاکستان سفير ورغوښتی وو او احتجاج یې ورته کړی دی. دې وزارت زياته کړې چې "پاکستان بايد پوه شي چې له دا قسمه حملو څخه مغرضانه کړۍ د دواړو هېوادونو د اړيکو خرابولو لپاره ګټه پورته کولی شي."

پر خوست د بمبارۍ پرضد مظاهره شوې