د بلوچستان حکومت د صوبې د هغو کروندګرو خلاف کارروايي کړې چې د سېپټېمبر پر اتمه یې د حکومت لخوا له ایران او افغانستانه د سبزي راغوښتل کېدو پریکړې پر ضد احتجاج کړی وو.
د بلوچستان د قلات ضلعې کروندګرو د سېپټېمبر پر اتمه پر دې خبره سخت احتجاج کړی وو چې مرکزي حکومت ولې له افغانستانه او ایرانه پیاز او ټماټر یا رومیان وارد کړې دي. د احتجاج پر مهال ځینو مظاهره کوونکیو له یوه کانټینره چې له ایرانه پکې ترکاري راوړل شوې وه، ټماټر غورځولي ول. پر ټولنیزو رسنیو د دې پېښې د وېډیو له خپرېدو وروسته پولیسو د مظاهره کوونکیو لټون پیل کړی وو. احتجاج کوونکو له قلاته کراچۍ ته تللې لاره هم تر څه مهاله تړلې وه.
د قلات ډوېژن کمېشنر داود خلجي نن، د سېپټمبر پر ۱۰مه، مشال راډيو ته وویل، حکومت د احتجاج کوونکیو کروندګرو خلاف ګامونه پورته کړي او پر ضد یې مقدمې درج کړې دي. نوموړی وايي، یو شمېر کروندګر یې نیولي، پر ضد یې مقدمې درج کړي او د ځینو نورو لټون یې پیل کړی دی.
دا هم وګورئ: سیلابونو په خیبر پښتونخوا او بلوچستان کې پر لکونو اېکړه ځمکه ولاړ فصلونه او باغونه تباه کړي
په کوټه کې د بلوچستان د ګروندګرو اتحادیې مرکزي جنرل سیکرټري حاجي عبدالرحمان بازی مشال راډیو ته وویل چې د سېلابونو له وجې وار له مخې د زمیندارانو ډېر نقصان شوی او له ګاونډیو هیوادونو څخه د پیازو او ټماټرو راغوښتل کېدو پرېکړې دوی نور هم اندېښمن کړي دي.
زمینداران وايي، که دوی ته لارې خلاصې او اسانتیاوې ورکړل شي نو دوی په هېواد کې د سبزي کمی پوره کولی شي. بلخوا د ایران او افغانستان سره تجارت کوونکو سوداګرو په پېښه خپګان ښودلی او ویلې یې دي چې مخنیوی یې باید وشي.
ستاسې سېسټم د HTML5 په چلولو کې ستونزه لري.
واڼه کې د اوبو کمښت کروندګرو ته لوی زیانونه اړولي
د بلوچستان صوبې تجاران وايي، له افغانستان او ایران سره دې د برابرۍ په بنیاد سوداګري وشي. د پاکستان د نورو صوبو په شان په بلوچستان کې هم وروستیو ورښتونو او سېلابونو فصلونو ته په لویه پیمانه تاوان رسولی دی. حکومت د پیازو او ټماټرو د کمبوت د پوره کولو لپاره له ګاونډیو هیوادونو افغانستان او ایران څخه واردات کړي وو. په دې کار باندې د بلوچستان صوبې کروندګر خپه دي او وايي، له بهره د ترکارۍ له راتلو وروسته د دوی د ځايي پیازو او ټماټرو نرخونه پرېوتلي دي.