د خیبر ضلعې په علي مسجد سیمه کې په ځانمرګي برید کې د وژل شوي پولیس افسر عدنان اپریدي جنازه تېر ماښام (د جولای پر ۲۵مه) شاکس پولیس لاینز کې وشوه.
د خیبر پښتونخوا پولیسو پر خپله ټویټر پاڼه ورکړي چې د جمرود (ایډیشنل اېس اېچ او) عدنان اپریدي په جنازه کې ګڼو پولیس چارواکو ګډون وکړ او له دغې وروسته خاورو ته وسپارل شو.
عدنان اپریدی پرون ( دجولای په ۲۵مه) د جمرود د علي مسجد په غار اوبه سیمه کې په یو ځانمرګې حمله کې ووژل شو.
په خیبر پښتونخوا کې د ژغورنې ادارې (ریسکیو ۱۱۲۲) وياند بلال فېضي د جولای پر ۲۵مه مشال راډيو ته وويل چې په دغه حمله کې جماعت هم په مکمله توګه ړنګ شوی دی.
ځايي انتظامي چارواکو مشال راډيو ته ويلي چې پرون (د جولای پر ۲۵مه) يو ځانمرګي بریدګر هغه وخت په ځان پورې تړلي چاودونکي مواد وچوول چې پولیسو یې د نيولو هڅه کوله.
د پولیسو په خبره بل ځانمرګی بریدګر یې هدف ته تر رسېدو د مخه نيولی دی.
تر اوسه کومې ډلې په دې اړه څه نه دي ويلي.