په هند کې د افغانستان سفارت د نومبر له ۲۴مې څخه په بشپړه توګه تړل شوی دی.
هغه سفارت د نومبر پر ۲۴مه پر اېکس پاڼه په یوه اعلامیه کې د دې وجه د هندي حکومت فشار او د ډېپلوماټیک ملاتړ نه شتوالی ښوولی دی.
په اعلامیه کې لیکل شوي چې وار له مخه یې د اکتوبر له لومړۍ راهیسې په هند کې خپل فعالیتونه ځنډولي ول او هیله یې لرله چې د هند حکومت یو داسې دریځ غوره کړي چې د دوی د فعالیتونو د دوام لپاره اغېزناکه وي.
سفارت ویلي چې د اتو اوونیو انتظار په وخت کې یې تمه لرله چې د ډېپلوماټانو ویزې به یې وغځېږي او د هندیو چارواکو په دریځ کې به بدلون راشي خو د هندي حکومت او طالبانو فشار د سفارت بندېدو ته مجبوره کړل.
Press Statement24th November, 2023 The Embassy of the Islamic Republic of Afghanistan announces permanent closure in New Delhi.The Embassy of the Islamic Republic of Afghanistan in New Delhi regrets to announce the permanent closure of its diplomatic mission in New Delhi 1/2 pic.twitter.com/VlXRSA0vZ8
— Afghan Embassy India (@AfghanistanInIN) November 24, 2023
افغان سفارت په اعلامیه کې له هنده غوښتي چې د افغانستان د سفارت ټولې شتمنۍ، موټر او په بانکي حساب کې شاوخوا پینځه لکه ډالره په خوندي توګه وساتي.
په بیان کې سپارښتنه شوې چې د افغانستان درې رنګه بیرغ دې هم د سفارت پر ودانۍ رپاند پاتې شي.
د هند او طالبانو حکومتونو په سمدستي ډول د سفارت د اعلامیې په غبرګون کې څه نه دي ويلي. نوي دلي البته مخکې ویلي ول چې په هغه هېواد کې به ځینې افغان قونسلګریانې فعاله پاتې وي.