د عوامي نيشنل ګوند (اې اېن پي) مرکزي مرستیال مشر (سینییر نایب صدر) امير حيدر خان هوتي په انتخاباتو کې تر ماتې وروسته له ګوندي عهدې استعفا ورکړې ده.
هوتي د فبرورۍ پر نهمه د انتخاباتو د نارسمي او غیر حتمي پایلو تر اعلانېدو وروسته پر اېکس لیکلي دي په "خلاص زړه د خپلې پلرنۍ سیمې مردان په ټولو حلقو کې د اې اېن پي د ماتې مسوولیت" مني او د ګوند د مشرتابه له عهدې استعفا ورکوي.
میرے آبائی ضلع مردان کے تمام حلقوں پر اے این پی کی شکست کی ذمہ داری کھلے دل سے تسلیم کرتا ہوں۔ میرے حلقہ اور مردان کے عوام نے اگر ہم پر اعتماد نہیں کیا تو اور اسی شکست کی ذمہ داری قبول کرتے ہوئے پارٹی کے مرکزی سینئر نائب صدر کے عہدے سے مستعفی ہونے کا اعلان کرتا ہوں اور پارٹی کے…
— Ameer Haider Khan Hoti (@HaiderHotiANP) February 9, 2024
هوتي ویلي دي چې تر دې وروسته به د ګوند د عادي غړي په توګه کار ته دوام ورکوي او د خدايي خدمتګار غورځنګ د بنسټګر او د عدم تشدد د فلسفې لاروي خان عبدالغفار خان چې د باچا خان په نوم پېژندل کېده، د "کاروان ملګری" به وي.
هوتي د ۲۰۲۴ز کال په ټاکنو کې د پاکستان د قامي اسمبلۍ د ۲۲مې حلقې او د خیبر پښتونخوا د ۵۸مې صوبايي حلقې څوکیو ته نوماند وو چې د نارسمي او غیر حتمي نتیجو تر اعلان وروسته یې پر اېکس په خپل لومړي بیان کې خپلو سیالانو عاطف خان او عبدالسلام خان ته مبارکي هم وویله.
امیر حیدر خان هوتي د مردان ضلعې د سیاسي کورنۍ غړی دی. هغه د ۲۰۱۸ز کال په ټاکنو کې تر بریا وروسته په قامي اسمبلۍ کې د عوامي نیشنل ګوند یوازینی استازی وو.
هوتي د ۲۰۰۸ز کال په ټاکنو کې تر بریالیتوب وروسته پینځه کاله د خیبر پښتونخوا اعلا وزیر په توګه دنده ترسره کړې وه.