د طالبانو حکومت وايي چې د افغانستان د شمال ختیز بدخشان ولایت په یوشمېر ولسوالیو کې یې د حکومت پر ضد تر لاریونونو وروسته د "ستونزو" د څېړنې او هواري لپاره یو پلاوی ټاکلی دی.
د طالبانو حکومت ویاند ذبیح الله مجاهد د مې پر څلورمه په يوه خبرپاڼه کې وويل چې سرتېرو یې په پټیو کې د کوکنارو بوټي تلفول چې د سیمې ځینو خلکو ورسره جنجال کړی دی.
په بیان کې راغلي دي چې د طالبانو حکومت "د ستونزو څېړنو" لپاره د لوی درستیز فصیح الدین فطرت په مشرۍ یو پلاوی ټاکلی دی.
په بدخشان کې د کوکنار د له منځه وړو د بهیر او په وړاندې یې د پيښو ستونزو د څیړنې لپاره هېئت وټاکل شو https://t.co/n3ml9GQ9DAhttps://t.co/RjqJDauQ5M pic.twitter.com/ysppMkYzAY
— Zabihullah (..ذبـــــیح الله م ) (@Zabehulah_M33) May 4, 2024
د بیان له مخې، هغه پلاوی به د خپلو پلټنو او څېړنو راپور د حکومت مشر ته سپاري.
دا په داسې حال کې ده چې په تېرو دوو ورځو کې د بدخشان له ځینو سیمو خپرې شوې وېډیوګانې ښيي چې سیمه ییز خلک د طالبانو ځواکونه پر خپلسرو کړنو، د ملکي خلکو پر وژنو، ځورونو او د هغوی کورونو ته پر ننوتو تورنوي او د حکومت پر ضد یې شعارونه ورکوي.