د خيبر پښتونخوا په کوز دير او پېښور، او د سيند په کراچۍ کې سلګونو کسانو د ملاکنډ پوهنتون د زده کوونکي موسا خان د مړينې پرضد احتجاج وکړ.
موسا خان د مې پر ۳۰مه پر موټر سايکل په يوه ټرافيکي پېښه کې مړ شوی او دوه ملګري يې ژوبل شوي ول. خو احتجاج کوونکي د هغه د مرګ پړه د پوهنتون پر انتظاميې اچوي، ځکه هغوی تور پورې کوي چې انتظاميې په هغه ورځ نوموړی د پوهنتون له هاسټله ايستلی وو.
په کوز دير کې د ملاکنډ پوهنتون مخې ته يو احتجاج کوونکي اظهار خان مشال راډيو ته وويل: "موږ پر دې بنياد دا خبره کوو چې د پوهنتون مشران د موسا خان سرپرستان ول. د هغه دلته پلار نه وو، مور يې نه وه او نور رشته داران يې نه ول. دوی [انتظاميه] ذمه وار دي او دوی موسا خان له هاسټله ايستلی دی نو ځکه موږ دا پړه پر دوی اچوو."
موسا خان په ملاکنډ پوهنتون کې د عوامي نېشنل ګوند د زده کوونکو سازمان، پشتون سټوډنټس فېډریشن مرستيال مشر وو. دا ګوند وايي انتظاميې د مې پر ۲۹مه له نوموړي او د هغه له ملګرو په هاسټل کې د رباب غږولو د سپيناوي لپاره ځواب غوښتی وو. د دې ګوند په خبره، موسا خان د رباب غږولو له امله له هاسټله ایستل شوی وو او کله چې نوموړی شپه مهال کور ته روان وو نو ټکر یې کړی دی.
پختون سٹوڈنٹس فیڈریشن اور دیگر طلباء تنظیموں کا پی ایس ایف ملاکنڈ یونیورسٹی کے ڈپٹی جنرل سیکرٹری موسی خان کی شہادت اور یونیورسٹی انتظامیہ کی نااہلی کے خلاف احتجاجی مظاہرہ، عوامی نیشنل پارٹی کے صوبائی صدر میاں افتخار حسین احتجاجی مظاہرے سے خطاب کررہے ہیں۔ @MianIftikharHus#ANP |… pic.twitter.com/hX1kOHZYE6
— Awami National Party (@ANPMarkaz) June 3, 2024
خو د ملاکنډ پوهنتون اداري مشر ډاکټر الطاف حسین اخوندخېل دا تورونه ردوي. هغه د زده کوونکو د احتجاج په اړه د غبرګون لپاره د مشال راډيو ټېلېفون ته ځواب ونه وايه خو نوموړي د جون پر دويمه په يوه ويډيويي بيان کې ادعا کړې وه چې پر زده کوونکيو د کلتوري پروګرامونو هېڅ بندیز نشته. هغه وويل چې د عدالت د حکم له مخې په پوهنتون کې پر سیاسي فعاليت بندیز دی نو ځکه یې ټولو زده کوونکو ته په دې اړه خبرداری لېږلی وو.
بلخوا د ملاکنډ پوھنتون انتظامیي د جون پر دويمه د پاکستان ډان ورځپاڼې ته ادعا کړې وه چې موسا خان او د هغه ملګري يې له هاسټله بې له اجازې وتلو او پر يوه پيه د موټر سایکل چلولو پر سر ايستلي ول.
د پاکستان د بشري حقونو کمېشن له حکومته غوښتنه کړې چې له ملاکنډ پوهنتونه د زده کوونکي موسا خان د ایستل کېدو په اړه دې د حقیقت معلومولو لپاره پلټنې وکړي. دې کمېشن د جون پر دويمه پر اېکس پاڼه ليکلي چې د ژورناليزم د دې شاګرد د مرګ په اړه شفاف او بې پرې تحقیقات غواړي
د خیبر پښتونخوا ګورنر فیصل کريم کونډي هم د مې پر ۳۱مه د ملاکنډ پوهنتون چارواکو ته په ليږلي ليک کې په دې اړه رپورټ او پلټنې غوښتې دي. د خيبر پښتونخوا د تعليم وزير د جون پر درېيمه، د صوبايي اسمبلۍ غونډې ته وويل چې د پېښې په اړه يې د پلټنو لپاره کمېټۍ جوړه کړې چې نن به ځواب جمع کوي.