په کراچۍ ښار کې د شیعه او سني مذهبي فرقو ترمینځ په نښته کې لږ تر لږه دوه کسان وژل شوي او نهه نور ټپیان شوي دي.
د کراچۍ پوليسو په وينا، پېښه هغه مهال وشوه، چې د اهل سنت والجماعت قافله د ښار له ګولیمار سیمې څخه تېرېدله.
په سیمه کې د شیعه ګانو د کېمپ مخې ته نښته وشوه او هغه مرګژوبله یې واړوله.
دواړو فرقو پر یو بل د حملې ذمه واري اچولې ده. سيند حکومت هم د پېښې نوټس اخیستی او له پولیسو یې د پېښې بشپړ معلومات غوښتي دي.
دا په داسې حال کې ده چې د اګست پر ۲۶مه، په کراچۍ او ټول هېواد کې شیعه ګان د کربلا پېښې د څلویښتۍ مراسم کوي. حکومت د کراچۍ په ګډون په ټول ملک کې سخت امنیتي تدابیر نیولي او په ګڼو برخو کې یې موبایل فون او انټرنېټ هم بند کړی دی.
په ګولیمار کې د نښتې پر مهال قهرجن خلکو یو بس، څلور موټرې او موټرسایکلونه هم سوځولي دي.
د کراچۍ پولیسو ویاند، محمد ریحان، مشال راډیو ته وویل چې د پولیسو مشر د پېښې نوټس اخیستی او د حالاتو قابو کولو لپاره یې سیمې ته پولیس او رینجرز سرتېري استولي دي.
دا هم وګورئ:
په کورمه کې شیعه او سنيان د سېپټمبر تر دویمې پر اوربند سلا شوي ديکراچۍ کې هره ورځ ۱۰تنه په ډزو وژل کېږيپه سیند کې ترهه ګري ولې راټوکېږي؟کراچۍ کې فرقه ایز تشدد بیا دوه کسان وژليبلخوا په کراچۍ کې د اهل سنت والجماعت یو مشر تاج محمد حنفي رسنیو ته ویلي چې د اګست پر ۲۵مه، اهل سنت والجماعت د ښار په طارق روډ سیمه کې د ختم نبوت او د صحابه کرامو عظمت لپاره جلسه جوړه کړې وه او د جلسې لپاره یې پلویان په ګاډو کې له ګولیمار سیمې څخه تېرېدل چې شیعه ګانو ورباندې برید وکړ.
نوموړي وویل چې په پېښه کې وژل شوي او ژوبل شوي د دوی کسان دي چې ژوبل یې دا مهال په روغتونونو کې تر درملنې لاندې دي. د پېښې وروسته، اهل سنت والجماعت د طارق روډ په سیمه کې احتجاجي پرلت پیل کړی او د حکومت څخه یې په پېښه کې د ککړو کسانو د ژر تر ژره نیولو غوښتنه کړې ده.
بل لور ته، شیعه عالمانو پر اهل سنت والجماعت تور پورې کړی چې د دوی پر کېمپ یې برید کړی دی.
د سيند اعلی وزیر مراد علي شاه، ګورنر کامران ټېسوري او د بېلا بېلو سیاسي ګوندونو مشرانو په خپلو بیانونو کې له شیعه او سني عالمانو څخه غوښتي چې دې پېښې ته د فساداتو رنګ ورنه کړي او خلک دې پرامنه پاتې شي.
په همدې حال کې، د سيند د کورنیو چارو وزیر ضیا الحسن لنجار ویلي دي چې د اګست پر۲۶مه به په کراچۍ، حیدراباد، سکهر او ګڼو نورو سیمو کې د امنیت د ساتلو لپاره موبایل فون او انټرنیټ له سهاره تر ماښامه بند وي، خو د کراچۍ او سيند په ځینو سیمو کې موبایل فون او انټرنېټ د اګست پر ۲۵مه له شپې راهسې بند شوی دی.
په کراچۍ کې د سني او شیعه ترمینځ تاوتریخوالی یوه اوږده او پېچلې تاریخچه لري چې په ۱۹۸۰مو کلونو کې پیل شوه او هغه د وخت پوځي واکمن جنرل ضیاالحق د حکومت پر مهال، مذهبي حساسیتونه زیات شول.
په ۱۹۹۰ او ۲۰۰۰مو کلونو کې کراچۍ د سني او شیعه ترمینځ د هدفي وژنو او چاودنو یو مرکز وګرځېد، چې د سیاسي او مذهبي ګوندونو ترمینځ د جګړو او وسلوالو ډلو د نفوذ له امله نور هم زیات شو.
که څه هم په وروستیو کلونو کې د حکومت او امنیتي ادارو لخوا د عملیاتو له کبله تاوتریخوالی یو څه کم شوی، خو بیا هم دا ستونزه په بشپړ ډول له مینځه نه ده تللې او د محرم میاشتې او مذهبي مراسمو په مهال هغه مسلکي ستونزې لا هم د خلکو ترمنځ د جګړو او شخړو سبب کېږي.