د پاکستان د کورنیو چارو وزیر د تحریک انصاف سیاستوالانو او پلویانو ته خبرداری ورکړی دی چې که په اسلام اباد کې یې د مظاهرې هڅه وکړه نو پرضد به یې اقدام وکړي.
محسن نقوي د اکتوبر پر درېیمه په اسلام اباد کې خبریالانو ته وویل چې د ملایشیا د وزیراعظم په ګډون د نورو هېوادونو پلاوي د پاکستان په سفر دي نو ځکه دې تحریک انصاف احتجاج نه کوي.
نوموړي زیاته کړه چې حکومت د وضعیت کنټرولولو لپاره د پوځ او رېنجرز ځواک سرتېري هم اسلام اباد ته وربللي دي.
دا په داسې حال کې ده چې تحریک انصاف د خپل زنداني رهبر عمران خان د خوشې کولو او د عدلیې د ازادۍ لپاره نن (د اکتوبر پر څلورمه) د اسلام اباد په جمهوریت څلورلاره یا ډي چوک کې د مظاهرې اعلان کړی دی.
هغه ګوند د اکتوبر پر دویمه هم د پنجاب په یوشمېر ښارونو کې مظاهرې اعلان کړې وې خو صوبايي حکومت د جنايي قانون د ۱۴۴مې مادې په عملي کولو پر ولسي غونډو او احتجاجونو بندیز ولګاوه.
تحریک انصاف او د اسلام اباد اوسېدونکي وايي چې انتظامیې هغه ښار ته تلونکې لارې تړلې دي او په بېلابېلو ځایونو کې یې کانټینرونه درولي دي.
ساری ریاستی طاقت پاس ہونے کے باوجود اپنی ہی نہتی عوام کو احتجاج کے اپنے بنیادی حق سے محروم کرنے کےلیے اگر وفاقی دارالحکومت کے گلی کوچوں کو اسطرح سے بند کرنا پڑے تو پھر چوڑیاں پہن کر ہار مان لو۔No army can stop an idea whose time has come. (Victor Hugo)pic.twitter.com/bVCog7pz3W
— Qasim Khan Suri (@QasimKhanSuri) October 4, 2024
تحریک انصاف په وروستیو کې د عمران خان د خوشې کولو لپاره د احتجاجونو لړۍ پیل کړې ده.
هغه ګوند د سېپټېمبر پر ۲۱مه په دې لړ کې په لاهور کې جلسه کړې وه. له دې دوه اوونۍ مخکې ګوند د اسلام اباد سره نېږدې جلسه کړې وه او د عمران خان د خوشې کولو لپاره یې حکومت ته دوه اوونۍ مهلت ورکړی وو. د هغې جلسې وروسته د اسلام اباد پولیسو د تحریک انصاف د مخکښ بیریسټر ګوهر په ګډون ځینې مشران نیولي ول چې د څو ورځو تر قید وروسته عدالت خوشې کړل.
تحریک انصاف د پاکستان په قامي اسمبلۍ کې ګڼې څوکۍ لري چې غړي یې د اپوزیشن په څوکیو ناست دي. هغه ګوند د ۲۰۲۴ز کال د فیبرورۍ په انتخاباتو کې د دریم ځل لپاره د خیبر پښتونخوا حکومت ګټلی دی چې اوس مهال یې مشري علي امین ګنډه پور کوي.
د پاکستان تحریک انصاف ګوند بنسټګر عمران خان د ۲۰۲۳ کال د مې پر نهمه نیول شوی وو، ځکه چې پر هغه تور وو چې په حکومت کې یې دولتي ډالۍ په غیر قانوني توګه پلورلې وې. د هغه نیونه په ټول پاکستان کې د پراخو لاریونونو لامل شوه، چې د پوځ پر تاسیساتو هم بریدونه وشول. وروسته سپریم کورټ د هغه ګرفتاري غیرقانوني وګرځوله او هغه خوشي شو. له دې پس د هم دغه کال د اګست پر پینځمه د اسلام اباد سېشن عدالت عمران خان ته په توشه خانه کیس کې د درو کلونو د بند سزا واوروله او عمران خان بیا ونیول شو.
هغه مهال پر عمران خان نورې مقدمې هم جوړې شوې او سزاګانې ورته واورول شوې خو په جولای کې عدالت د عدت تر پای ته رسېدو مخکې د نکاح په قضیه کې د عمران خان او د هغه د مېرمنې، بشرا بي بي، د خوشې کولو امر وکړ، خو هغوی لا هم د "توشه خانې" په قضیه کې په بند کې پاتې دي.
له دې پرته د تحریک انصاف یوشمېر نور مخکښه مشران هم په بېلابېلو قضیو کې بندیان دي چې د خوشې کولو لپاره یې پلویانو وخت په وخت احتجاجونه کړي دي. تحریک انصاف د نوموړي او د ګوند د نورو مشرانو او غړو پرضد ټولې قضیې سیاسي سازش بولي او ورباندې لګېدلي تورونه ردوي.