د پاکستان په پلازمېنه اسلام اباد کې د قایداعظم پوهنتون د زده کوونکو د دوو ډلو ترمینځ په نښته کې پینځه زده کوونکي ژوبل شوي دي.
د پوهنتون یو چارواکي، چې له رسنیو سره یې د خبرو اجازه نه لرله، د نوم پټ ساتلو په شرط مشال راډیو ته وویل چې هغه نښته د اکتوبر ۱۰مې په ماښام د زده کوونکو د دوه ټولنو پښتون کونسل او پنجابي کونسل د زده کوونکو ترمینځ وشوه.
تر نښتې وروسته پر ټولنیزو رسنیو په خپرو شویو ویډیوګانو کې ښکاري چې ځینې کسان هوایي ډزې کوي.
قائد اعظم یونیورسٹی اسلام آباد میں پشتون کونسل اور پنجاب کونسل کے درمیان شدید لڑائی۔ فائرنگ کی بھی اطلاعات ہیں۔ ایک طرف مُلک جل رہا ہے تو دوسری طرف تعلیم ادارے میدانِ جنگ بنے ہوئے ہیں۔ نکمی یونیورسٹی انتظامیہ اور ریاست مکمل طور پر ناکام ہوچکی ہے۔ افسوس!#QuaidEAzamUniversity #QAU pic.twitter.com/m6vuRlXJ0m
— عَـلّامَـہ بَـادَہ کَـشؔ 🇱🇧🇵🇸🏴 (@Baadaksh) October 10, 2024
د اسلام اباد د پیمز روغتون یو چارواکي رضوان الله مشال راډیو ته ویلي چې دوی ته ځینې ژوبل زده کوونکي وروړل شوې دي او درملنه یې روانه ده.
قاید اعظم پوهنتون د پاکستان له لویو او ښو پوهنتونونو یو بلل کېږي چې پکې تر دې مخکې هم د زده کوونکو د ډلو ترمینځ نښتې شوې دي. په ۲۰۲۳ز کال کې هلته د زده کونکو ترمینځ د نښتو وروسته پوهنتون د څه مودې لپاره بند شوی وو.
د قاید اعظم پوهنتون انتظامیې تر نښتې وروسته په یو بیان کې سر له ننه (د اکتوبر له۱۱مې) بيا د اکتوبرتر ۲۰مې د هاسټلونو تړلو اعلان کړی او پر زده کوونکو یې غږ کړی چې هاسټلونه خالي کړي.
په اعلامیه کې دا هم ویل شوي دي چې د شانګهای همکارۍ سازمان د غونډې پر مهال به انټرنېټ او د موبایل ټېلېفونونو خدمات هم بند وي. ټاکل شوې ده چې د شنګهای همکارۍ سازمان غونډه د اکتوبر پر ۱۵مه او ۱۶مه په اسلام اباد کې وشي.