د پاکستان حکومت د نومبر له لومړۍ نېټې څخه تر راتلونکو دوو اونیو پورې د ډیزلو او پېټرولو بیې لوړې کړې دي.
د مالیې وزارت د اکتوبر پر ۳۱مه پر اېکس پاڼه (پخوانی ټوېټر) په اعلامیه کې ویلي چې په نړیوال بازار کې د تېلو بیو ته په کتو د یو لیټر ډیزلو نرخ شاوخوا څلور روپۍ زیاتوي چې ورسره یې نوې بیه ۲۵۵ روپۍ ته رسېدلې ده.
وزارت دا راز ویلي چې د یو لیټر ډیزلو بیه څه باندې یوه روپۍ لوړوي چې ورسره یې نرخ څه باندې ۲۴۸ روپۍ ته لوړ شوی دی.
د پاکستان حکومت د اکتوبر په نیمايي کې هم د ډیزلو بیه پینځه روپۍ لوړه کړې وه خو د پېټرولو هغه یې پر ځای ساتلې وه.
د مالیې وزارت په بیان کې زیاته کړې چې د یو لیټر خاورو تېلو نرخ شاوخوا یوه نیمه روپۍ کموي چې ورسره یې بیه ۱۶۱ روپۍ ۵۴ پیسو ته ښکته شوې ده.
پاکستان په ۲۰۱۹ز کال کې د لوی اقتصادي او مالي بحران له ښکار کېدو راهیسې د پیسو له نړیوال صندوق (ای اېم اېف) سره د پور یو لړ موافقې کړې دي او د هغې مالي ادارې د شرطونو پوره کولو لپاره یې پر انرژۍ د حکومتي رعایتونو ختمولو ته دوام ورکړی دی چې له کبله یې د تېلو، ګیس او برېښنا بیې لوړې شوې دي.